मधेसमा माओवादीको ओरालो यात्रालाई प्रचण्डले लगाउन सक्लान ब्रेक ?

महोत्तरी- मधेसमा नेकपा  माओवादी केन्द्रको तिव्र ओरालो यात्रालाई के अध्यक्ष पुष्पकमल दाहाल प्रचण्डले ब्रेक लगाउन सक्लान ?

मधेस प्रदेशमा अध्यक्ष प्रचण्डसहित आधा दर्जन केन्द्रीय पदाधिकारीहरू आज र भोलि पार्टीको सागंठनिक अवस्था र पछिल्ला परिणामहरूको विषयमा निर्मम समिक्षा गर्न आइपुगेका छन् ।

यही सन्दर्भलाई लिएर चिया र चौतारीहरूमा मधेसको खस्कँदो सागंठनिक अवस्थालाई सुधार गर्न प्रचण्डले कस्तो रणनीति अवलम्बन गर्छ्न् भन्ने आम चासो बनेको छ ।

नेता र कार्यकर्ताहरूको भावनालाई आत्मासाथ गर्न नसक्दा पछिल्लो समय असन्तुष्ट पक्षहरूहरूलाई नेकपा एमाले, जसपा, लोसपा जस्ता दलहरूले व्यवस्थापन गरिरहेको देखिन्छ ।

१ वर्षको अवधिमा माओवादीकै उच्च तहका नेताहरूको तथ्यांकअनुसार ६ सयभन्दा बढी नेता, कार्यकर्ताहरूले पार्टी छाडिसकेका छन् ।

अझ अचम्म लाग्दो त कहाँनिर छ भने नेकपा एमालेले त माओवादी केन्द्रबाट भित्र्याएका नेता, कार्यकर्ताहरूलाई पार्टी बलियो बनाउने अस्त्र नै बनाएको छ ।

उदाहरणको रुपमा महोत्तरीको अहिलेको एमालेको सागंठनिक अवस्थालाई हेर्न सकिन्छ । यसअघि भएको एमाले अधिवेशनमा माओवादीबाट नै प्रवेश गरेका बलिराम यादवलाई नेतृत्व दिइएको छ भने पदाधिकारीमा पनि अधिकांश माओवादीबाट भित्रिएकाहरू नै छन् ।

जिल्लाको मात्र हैन स्थानिय तहको अवस्था हेर्ने हो भने एमालेले माओवादीबाट भित्रिएकाहरूलाई प्राथमिकतामा राखेको छ ।

महोत्तरीको उत्तरी क्षेत्र बर्दिवासमा सचिव, सहसचिवदेखि पदाधिकारीमा माओवादीबाट भित्रिएकाहरू छन् ।

दक्षिणतर्फ माओवादी बलियो देखिएका पालिकाहरूमा एमालेले उनिहरूलाई पार्टी बलियो बनाउने हतियार बनाएको छ । माओवादीको बलियो पकड भनिएको सम्सीमा माओवादीबाट नै प्रवेश गरेकालाई अध्यक्षको नेतृत्व दिइएको छ ।

यस्तो अवस्था महोत्तरीमा मात्र हैन अन्य जिल्लाहरूमा पनि देखिन्छ । केन्द्र तहका ज्वाला कुमारी साहदेखि बुदिनी देवीसम्म आइपुग्दा एमालेले नै उनीहरूलाई परिचालन गरेर पार्टीको संगठनलाई मजबुत बनाउँदै लगेको छ भने माओवादी केन्द्र थप कमजोर बन्दै गएको देखिन्छ ।

'पार्टी कमजोर हुनुमा यसका अन्तर्यहरू मुलतः आन्तरिक कलह नै हो' केन्द्रीय सदस्य प्रकाशहरि पोखरेलले भने 'यो विषयमा पनि आज र भोलि हुने बैठकमा निर्मम समीक्षा हुनेछ ।'

बैठकमा उठेका विषयहरूको पार्टी अध्यक्ष प्रचण्ड स्वयमले दस्तावेज बनाउने र उपयुक्त छलफल गरेर निष्कर्ष निकालिने केन्द्रीय सदस्यहरूले बताएका छन् ।

अझ मधेसमा संस्थापन पक्ष र संस्थापन इतरको नाममा अनेक गुटबन्दी सिर्जना भएको माओवादी केन्द्रका नेता, कार्यकर्ताहरू नै स्वीकार गर्छन् ।

सिरहा, सर्लाही, महोत्तरीमा पुर्व जनमोर्चा समूह र प्रचण्ड समुहबीच जहिल्यै कहीँ न कहीँ मतभेद सिर्जना हुने गरेको र केही आधार ईलाका भएका ठाउँहरू अघिल्लो निर्वाचनमा समेत गुमाउनुले यसलाई पुष्टि गरेको छ ।

यसैको परिणाम महोत्तरी क्षेत्र नं.१ मा गिरिराजमणि पोखरेलले संघमा र राजु खड्काले स्थानिय तहमा पराजय भोग्नुपरेको माओवादीका एक नेता बताउँछ्न् ।

'मधेसमा माओवादीमा देखिएको आन्तरिक कलहका कारण, असन्तुष्टि र नेता कार्यकर्ताहरूको पार्टी बहिगर्मनका विषयमा पनि बैठकमा गहन छलफल हुनेछ ।' माओवादी केन्द्र महोत्तरीइन्चार्ज राजु खडकाले भने । 'अब पार्टी कमजोर हुनुमा दोषारोपण गरेर मात्र हुँदैन मैदानमा काम गर्नुपर्ने अवस्था आएको छ ।'

मधेस प्रदेश इन्चार्ज गणेश साह एकअर्कोलाई दोष लगाउने तर कमजोरीका कारकहरूको विषयमा समीक्षा गर्न नसक्दा माओवादी कमजोर बन्दै गएको बताउँछन् ।

उनले एक अन्तर्वार्तामा प्रचण्डमा विकल्पको खोजीभन्दा पनि सच्चिनुपर्ने र सुधार गर्नुपर्ने कयौं ठाउँहरू भएको अभिव्यक्ति दिएका छन् ।

यसरी नेता, कार्यकर्ताहरूले असन्तुष्टि र बहिगर्मनलाई नेताहरूलाई नै मुख्य जिम्मेवार ठहर्‍याएका छन् । ६ प्रदेशमा बैठक सम्पन्न गरेर मधेस आइपुगेका पदाधिकारीहरूको छलफल महोत्तरीको बर्दिवास रिसोर्टमा भइरहेको छ ।

अध्यक्ष प्रचण्डसहित नेताहरू अग्नि सापकोटा, हरिबोल गजुरेल, गिरिराजमणि पोखरेल, नारायणकाजी श्रेष्ठ, पम्फा भुसाल, शक्ति बस्नेत, देव गुरुङ्ग बर्दिवास आइपुगेका छन् । वर्षमान पुन र मात्रिका यादव भने उपचारको क्रममा चीनमा छन् ।