अन्नपूर्ण संरक्षण क्षेत्रमा लेक लागेर एक वर्षमा २१ पर्यटकको मृत्यु

फाइल फाेटाे

काठमाडौँ - पदयात्रा र साहसिक पर्यटनका लागि विश्वभर ख्यातिप्राप्त अन्नपूर्ण संरक्षण क्षेत्रमा गत आव ०८०/८१ लेक लागेर २१ जनाको ज्यान गएको छ। अन्नपूर्ण संरक्षण क्षेत्र आयोजना (एक्याप)का प्रमुख डा. रविन कडरियाका अनुसार, मृतकहरूमा ६ जना नेपाली, ११ भारतीय, २ मलेसियन, १ युक्रेनी, र १ बेलायती नागरिक छन्।

डा. कडरियाका अनुसार मुस्ताङको मुक्तिनाथ क्षेत्र लेक लाग्नका लागि उच्च जोखिमयुक्त स्थल बनेको छ। उनले हिमाली क्षेत्रको पदयात्रामा जाँदा उचाइको ध्यान राख्न र स्वास्थ्यमा समस्या देखिनासाथ फिर्ता हुने सल्लाह दिएका छन्।

गत वर्ष पदयात्राका क्रममा लडेर पनि तीन जना विदेशी पर्यटकको ज्यान गएको छ। स्विडेन, जर्मनी, र अमेरिकाका ती पर्यटकहरूले विभिन्न चुनौतीको सामना गरेका थिए।

अन्नपूर्ण संरक्षण क्षेत्रमा गत वर्ष २ लाख २२ हजार १८० विदेशी पर्यटक भित्रिएका थिए । यो अघिल्लो वर्षको तुलनामा ५० हजार बढी हो। यस क्षेत्रको अद्वितीय प्राकृतिक सौन्दर्य, जैविक विविधता र हिमाली जनजीवनका कारण पर्यटकको आकर्षण बढ्दै गएको छ।

डा. कडरियाले लामो दूरीको पदयात्रामा एक्लै नजान र पथप्रदर्शकको साथमा समूहमा यात्रा गर्न सुझाव दिएका छन्। सुरक्षा सावधानी अपनाउँदै ट्रेकिङ एजेन्सीमार्फत यात्रा गर्दा जोखिम कम हुने उनले उल्लेख गरेका छन्।