भक्तपुर प्रहरीले भन्यो- गठ्ठाघरमा ट्रकले ठक्कर दिँदा मृत्यु हुने स्कुटर चालक पुरुष

काठमाडौँ- भक्तपुरको गठ्ठाघरमा ट्रकले ठक्कर दिँदा मृत्यु हुने स्कुटर चालक पुरुष रहेको खुलेको छ ।

मृतक करिब ४०-४५ वर्षीय पुरुष रहेको जिल्ला प्रहरी परिसर भक्तपुरका डीएसपी राजन कार्कीले जानकारी दिए । यसअघि महिला भनिएकोमा उक्त सनाखत गलत भएको उनले बताए । हालसम्म पनि मृतकको सनाखत भने हुन सकेको छैन ।

बिहीबार दिउँसो पौने २ बजेतिर ना. ६ ख २१७३ नम्बरको मालबहाक ट्रकले बा. ४९ प ८९४४ नम्बरको स्कुटरलाई ठक्कर दिएको थियो । ट्रकको चक्कामुनि परेर स्कुटर चालकको घटनास्थलमै मृत्यु भएको थियो । शव पोस्टमार्टमका लागि त्रिवि शिक्षण अस्पताल लगिएको छ ।

ट्राफिकले स्कुटरलाई चेकजाँच गर्दै गर्दा तीव्र गतिमा आएको ट्रकले घिसारेको प्रत्यक्षदर्शीले बताएका छन् ।

दुर्घटनापछि फरार रहँदै आएका ट्रक चालकलाई प्रहरीले पक्राउ गरेको छ । पक्राउ पर्नेमा सर्लाही घर भएका ३२ वर्षीय ट्रक चालक सतेन्द्र श्रेष्ठ रहेको प्रहरीले जनाएको छ ।

घटनापछि स्थानीयले प्रदर्शन गरेका थिए । प्रदर्शनका क्रममा प्रहरी र स्थानीयबीच झडप भएको थियो । जसका कारण गठ्ठाघर तनावग्रस्त समेत बनेको थियो । भीड र स्थितिलाई नियन्त्रणमा लिन प्रहरीले केही राउण्ड अश्रुग्यास पनि प्रहार गरेको थियो ।