पार्टी फुट्दैछ भनेर चलाइएको हल्ला निराधार : प्रचण्ड

काठमाडौँ- नेकपा (माओवादी केन्द्र) का अध्यक्ष पुष्पकमल दाहाल 'प्रचण्ड' ले पार्टी फुटको हल्ला निराधार भएको बताएका छन् ।

बिहीबार पार्टी कार्यालय पेरिसडाँडामा स्थायी कमिटीको बैठकपछि बाहिरिने क्रममा सञ्चारकर्मीसँग कुरा गर्दै प्रचण्डले पार्टी फुट्दैछ भनेर चलाइएको हल्ला निराधार भएको बताएका हुन् । पार्टीभित्र देखिएका कतिपय सन्दर्भमा आएका आशंका र भ्रम बैठक समापन हुँदासम्म चिरिएको उनले बताए ।

त्यस्तै उनले संक्रमणकालीन न्यायसँग सम्बन्धित विधेयक पीडितमैत्री रहेको उल्लेख गरे ।

प्रचण्डले विधेयकहरूले पीडितहरूको मागलाई राम्रोसँग सम्बोधन गरेकाले ढुक्क हुन आग्रह गर्दै अब कार्यान्वयनमा जोड दिने बताए । वर्तमान सरकारको एक महिने कार्यकालका विषयमा आफूले केही दिनमा संसदमा धारणा राख्ने उनको भनाइ छ ।