जम्मु कश्मीरलाई ‘दिलदेखि र दिल्लीदेखि’नै नजिक बनाउछौँ : मोदी

फाइल तस्बिर

नयाँ दिल्ली : भारतका प्रधानमन्त्री नरेन्द्र मोदीले जम्मु कश्मीरलाई दिलदेखि र दिल्लीदेखि नै नजिक बनाउने प्रतिवद्धता जनाएका छन् । जम्मु कश्मीरलाई दिल र दिल्लीदेखि नजिक बनाउनका लागि आवश्यक लोकतान्त्रिक प्रक्रिया पनि अपनाइने उनको भनाइ छ । 

प्रधानमन्त्री मोदीले जम्मु कश्मीरका सवै पक्षका नेताहरूसँगको बैठकका क्रममा आपसी सम्वन्धलाई बलियो र सुमधुर बनाउन आफू प्रतिवद्ध रहेको पनि उल्लेख गरेका हुन् । जम्मु कश्मीरमा हुन बाँकी रहेको क्षेत्रीय तथा संसद निर्वाचन गराउनु केन्द्रीय सरकारको उच्च प्राथमिकताको विषय रहेको पनि उनले स्पष्ट पारे ।  

झण्डै साढे तीन घण्टा भएको बैठकमा जम्मु कश्मीरका १४ नेता सहभागी भएका थिए । उनीहरूका कुरालाई प्रधानमन्त्री मोदीले ध्यानपूर्वक सुनेका थिए । भारतको संविधानको धारा ३७० खारेज गरेर जम्मु कश्मीरलाई विषेश दर्ता दिने व्यवस्थाको अन्त्य गरेपछि जम्मु कश्मीरका नेता र केन्द्रीय नेताबीचमा पहिलो पटक बैठक भएको हो । 

प्रधानमन्त्री मोदीले सन् २०१९ को अगस्टमा भारतको संविधानको धारणा ३७० लाई खारेज गरी जम्मु र कश्मीरलाई दिइएको विषेश दर्ता हटाइएको घोषणा गरेका थिए । उनीहरूलाई पनि केन्द्रीय सरकार मातहत नै ल्याइएको विषयमा केही विरोध भएपनि कार्यान्वयन भने भइसकेको छ । 

जम्मु र कश्मीरका नेताहरूसँगको छलफल राम्रो भएको भन्दै प्रधानमन्त्री मोदीले खुशी व्यक्त गरेको समाचारमा जनाइएको छ । जम्मु कश्मीरलाई कसरी अझ राम्रो बनाउने भन्ने बारेमा नेताहरूका बीचमा खुल्ला बहस भएकोले पनि बैठक सन्तोषजनक भएको प्रधानमन्त्री मोदीले बताएका थिए । (रासस)