सानोभर्‍याङ, जडिबुटी, बल्खु तरकारी बजार, माइतीघर मण्डला र रत्नपार्क क्षेत्र डुबान

तस्विरः फाइल फोटो

काठमाडौं- गएराति रातीदेखि परेको अविरल वर्षाका कारण काठमाडौँ उपत्यकाका विभिन्न ठाउँहरू फेरि डुबानमा परेका छन् । 

काठमाडौँ महानगरपालिका महानगर प्रहरी बल/विपद् व्यवस्थापन विभागका महाशाखा प्रमुख एवं नगरप्रहरी उपरीक्षक विष्णु प्रसाद जोशीले सानोभर्‍याङ,जडिबुटी,बल्खु तरकारी बजार,माइतीघर मण्डला र रत्नपार्क आसपासमा डुबानमा परेको जानकारी दिए। 

उनका अनुसार ज्ञानोदय स्कुल बाफल डुबानमा परेको छ । अहिले पानी कम हुँदै गइरहेको छ ।

उनले उक्त क्षेत्रका घरमा पानी परेकाले भौतिक क्षति भए पनि मानवीय क्षति नभएको उनले जानकारी दिए । खोलाले आफ्नो सतह पार गरेको भए पनि कुनै पनि क्षति नगरेको उनको भनाइ छ ।

'केही घरमा पानी पसेको छ । पानी रोकिएपछि त्यो पनि घट्दै गएको छ,' उनले भने ।  बागमती, विष्णुमती, धोबीखोला, हनुमन्ते खोला तथा बागमतीका सहायक नदीमा पानीको बहाव बढेर बस्तीमा छिरेको छ।