वर्तमान सरकारले सस्तो लोकप्रियताका लागि काम गर्न खोज्यो : शक्ति बस्‍नेत

काठमाडौँ- नेकपा (माओवादी केन्द्र) का नेता शक्तिबहादुर बस्नेतले सरकारको पछिल्लो गतिविधि प्रतिगमन उन्मुख देखिएको आरोप लगाएका छन् ।

प्रतिनिधिसभाको सोमबारको बैठकको विशेष समयमा बोल्दै बस्नेतले विद्युत् प्राधिकरण र संविधान संशोधनका विषयमा वर्तमान सरकार सुशासनतर्फ नभइ प्रतिगमन उन्मुख देखिएको आरोप लगाएका हुन् । वर्तमान सरकारले सस्तो लोकप्रियताका लागि काम गर्न खोजेको उनको भनाइ छ ।

उनले यसअघि लेखा समितिले गरेको निर्णय र अदालतको आदेश विपरीत हाल लेखा समितिमा भइरहेका बहस असान्दर्भिक रहेको जिकिर गरे । सार्वजनिक संस्थानहरूमाथि भएको सरकारको हस्तक्षेपले संस्थान थप धराशायी हुने उनले बताए । विद्युत् प्राधिकरणका दुई सदस्यको बर्खास्तप्रति आपत्ति जनाउँदै बस्नेतले आफ्नो फरक मत राख्दा कारबाही गर्नुले लोकतन्त्रमाथिको उपहास भएको धारणा राखे ।

त्यस्तै बस्नेतले स्थायित्व र विकासका नाममा संविधान संशोधन गरेर निर्वाचन प्रणाली र संघीयतामाथि कैंची लगाउने कोशीमा कांग्रेस-एमाले रहेको आशंका गरे । उनले संशोधनका नाममा हुने प्रतिगमन कुनै अवस्थामा स्वीकार्य नहुने स्पष्ट पारे । संघीय लोकतान्त्रिक गणतन्त्रको आत्मालाई मास्ने गरि संशोधनका नाममा देशलाई घात गर्न नपाइने उनको भनाइ छ ।