बेलायतमा हिंसात्मक प्रदर्शनका क्रममा ९० जनाभन्दा बढी पक्राउ

तस्बिर-बीबीसी

काठमाडौं - बेलायतमा हिंसात्मक प्रदर्शनका क्रममा ९० जनाभन्दा बढी पक्राउ परेका छन् । अति दक्षिणपन्थी आप्रवासी आन्दोलनले हिंसात्मक रुप लिएपछि बेलायतमा शनिबार ९० जनाभन्दा बढी पक्राउ परेका हुन् । 

हल, लिभरपुल, ब्रिस्टल, म्यानचेस्टर, ब्ल्याकपूल र बेलफास्टमा पसलहरू लुटिएका थिए भने प्रहरी अधिकारीहरूमाथि आक्रमण गरिएको थियो । तर सबै प्रदर्शन हिंसात्मक थिएनन्।

 प्रधानमन्त्री केयर स्टार्मरले घृणा फैलाउन खोज्ने चरमपन्थीहरू विरुद्ध कारबाही गर्न प्रहरीलाई सरकारले पूर्ण सहयोग गर्ने वाचा गरेका छन्। साउथपोर्ट, मर्सीसाइडमा सोमबार टेलर स्विफ्ट थिम पार्टीमा तीन बालिकाको हत्या भएपछि तनाव बढेको हो।

लिभरपुलमा प्रहरीमाथि इँटा, बोतल र फ्लेयर प्रहार गरिएको थियो । कुर्सी प्रहारबाट एक प्रहरीको टाउकोमा चोट लागेको थियो भने अर्कोलाई लात हानेर बाइकबाट खसालिएको थियो।