सेलाङकट्टीमा खानेपानी समस्या हट्यो

सिन्धुपाल्चोक- गतसाता आएको बाढी पहिरोबाट खानेपानीको समस्यामा परेका सिन्धुपाल्चोक भोटेकोशी गाउँपालिका- ४ सेलाङकट्टीका स्थानीयम मंगलवारबाट खानेपानीको समस्या हटेको छ ।

कमजोर भौगोलिक अवस्था रहेको भोटेकोशी गाउँपालिका-४ सेलाङकट्टीका स्थानीयले बाढी पहिरोको कारण एक सातादेखि खानेपानीको समस्या झेल्दै आएका थिए । गाउँपालिकाले पाइप उपलब्ध गराएर मुहानबाट पानी ल्याउन लागि परेपछि सेलाङकट्टीका एक सय  घर परिवारले खानेपानीको सुविधा पाएका छन् ।

बाढी पहिरोले मुहान आसपास र खानेपानी ल्याइरहेको पाइप बगाएपछि यहाँका स्थानीय एक सातादेखि खानेपानीको समस्या परेका हुन् । एक सय  घरपरिवार रहेको सेलाङकट्टीका स्थानीयलाई एकै मुहानबाट खानेपानी ल्याइएको थियो । किस्सा भन्ने ठाउँबाट ल्याएको पानीको मुहानमा  बाढी पहिरो लागेपछि उनीहरू समस्या परेका हुन् ।  बाढी, पहिरोले बिजोग बनाएको छ, खानेपानी अभाव हुँदा गाउँ बस्तीमा समस्या आइपरेको स्थानीय आङछिरिङ शेर्पाले बताए ।

पानी नहुँदा समस्या भयो अहिले गाउँपालिका अध्यक्षलगायतको टिमले खानेपानी ल्याउन सहयोग गरेपछि पानी बस्तीमा आएको शेर्पाले बताए । वर्षा याम सुरु भएसँगै सिन्धुपाल्चोकमा बाढी पहिरोले सताउने गरेको छ । कतिपय ठाउँमा बस्ती जोखिम छ भने कतिपय ठाँउहरूमा बाढी क्षति पुर्‍याएको छ । खानेपानीको समस्या भएपछि पैदल यात्रा गरेर भएपनि गाउँपालिकाले  एक सातादेखि खानेपानीको समस्यामा परेका सेलाङकट्टीका स्थानीयलाई पानी खुवाएको छ ।

पालिकाबाट पुग्ने र हुने सहयोगले पानी ल्याउनको लागि पाइप बिछ्याउन सहयोग गरेका छौं, अहिले सेलाङकट्टीका एक सय परिवारले आजबाट खानेपानीको समस्या झेल्नु नपर्ने भोटेकोशी गाउँपालिकाका अध्यक्ष पासाङ नोर्पु शेर्पाले बताए । हामीले पालिकाबाट विपद्‌को लागि छुट्याएको बजेटबाट झण्डै एक हजार मिटर पाइप सहयोग गरेर त्यहाका स्थानीयलाई खानेपानीको समस्याबाट मुक्त गरेको उनले बताए ।

गत साता सोही स्थानमा ३ घर पहिरोको जोखिममा परेका छन्, उनीहरूलाई गाउँपालिकाले तत्कालको समस्या साधन गर्नको लागि ३ थान टेण्ट दिएको छ । सेलाङकट्टीमा गएको पहिरो न्यूनीकरण गर्न पालिकाले चर्केको स्थानीयमा प्लास्टिक तथा त्रिपालले पानी छिर्न नदिने उद्देश्यले  जमिनमा त्रिपाल तथा प्लास्टिकले छोपेको छ ।