जगदम्बा स्टील्समा आगलागी हुँदा दुई भारतीयको मृत्यु

प्रतिकात्मक तस्बिर

जनकपुरधाम : बाराको जीतपुर-सिमरास्थित जगदम्बा स्टील्स कारखानामा शनिबार राति भएको आगलागीमा दुई जनाको मृत्यु भएको छ । तीन जना घाइते भएका छन् ।

आगलागीमा परी कारखानामा कार्यरत मजदुरद्वय भारत विहार पश्‍चिम चम्पारणका ४० वर्षीय प्रदीप गौड र ४५ वर्षीय रामनाथ महतोको घटनास्थलमै मृत्यु भएको प्रहरीले जनाएको छ ।

घाइते हुनेहरूमा इन्द्र प्रसाद अधिकारी, रामकुमार विश्‍वकर्मा र नवराज चौलागाई रहेका छन् । आगलागीमा परी घाइते भएकाहरूको उपचार वीरगञ्‍जको तराई अस्पतालमा भइरहेको र घटनास्थलमा रहेका ६ जना मजदुरमध्ये एक जना सुरक्षित रहेको जिल्ला प्रहरी कार्यालय बाराका प्रवक्ता प्रहरी नायव उपरिक्षक गौतम मिश्रले जानकारी दिए । 

शनिबार राति पेट्रोल र डिजेल भण्डारण गर्ने ट्यांकी वेल्डिङ्ग गरिरहेको बेला अचानक आगलागी हुँदा घटना भएको जिल्ला प्रहरी कार्यालय बाराले जनाएको छ । आगलागी नियन्त्रणमा आइसकेको र घटना सम्बन्धमा थप अनुसन्धान भइरहेको जिल्ला प्रहरी कार्यालय बाराले जनाएको छ ।