पूर्व-पश्चिम रेल बन्‍न करिब ५ सय वर्ष लाग्‍ने

फाइल फोटो

काठमाडौँ - पूर्व पश्चिम रेल बन्न कति समय लाग्ला ? ५ वर्ष १० वर्ष अथवा ५० वर्ष । तर, नेपालमा पूर्व पश्चिम रेल बन्न ५ सय वर्ष लाग्ने भएको छ । 

सरकारले रेल विभागलाई विनियोजन गरेको बजेट अनुसार सो समय लाग्ने भएको हो । 

रेलका लागि भन्दै सरकारले वार्षिक तीन अर्बको बजेट छुट्याउने गरेको छ । यो वर्ष पनि ३ अर्ब ५५ करोड बजेट छुट्याएको छ । यो पूर्व पश्चिम रेल निर्माणको लागि मात्रै नभएर समग्र रेल विकासका लागि हो । 

९ सय २५ किलोमिटर लम्बाइ रहेको यो रेलमार्गको लागत १५ सय अर्ब लाग्ने  रेल विभागका सूचना अधिकारी सिडिई कमल कुमार शाहले जानकारी दिए । 

'वार्षिक ३ अर्बको हाराहारीमा बजेट आउँछ' उनले भने', 'कति वर्षमा आयोजना सम्पन्न हुन्छ आफैं हिसाब गर्नुस् ।' वर्षको ३ अर्बको दरले हिसाब गर्ने हाे भने १५ सय अर्बकाे रेलमार्ग निर्माण गर्न ५ सय वर्ष लाग्छ ।

अहिलेसम्म करिब ३० अर्ब जति मुआब्जा लगायतको काम सकिएको उनले बताए । 

बर्दिवासदेखि चोचासम्मको रेल्वे सम्पन्न हुने चरणमा रहेकाे उनले जानकारी दिए ।  'पूर्व पश्चिमसम्मको हिसाब गर्ने हो भने १ प्रतिशत पनि काम भएको छैन', उनले भने, 'बर्दिबास चोचासम्मको ७० किलोमिटरमा काम धमाधम भइरहेको छ  ।' 

साे खण्डमा लिक हाल्ने, स्टेशन बनाउने, बिजुलीको पोलहरू राख्न स्रोत व्यवस्थापनका लागि योजना आयोग र अर्थ मन्त्रालयले ठेक्का अनुमति नदिएको उनले बताए । 

बर्दिवास-चोचासम्मको काम एक चरणको फाइनल भएर बसेको छ । त्यो भन्दा माथिल्लो रेलवे स्टेशन, रेल लिक बिछ्याउने जस्ता कामका लागि सहमति प्राप्त नभएकाे शाहले बताए ।  

सरकारको प्राथमिकतामा रेलमार्ग निर्माणको काम नपर्दा काम छिटो हुन नसकेको उनले बताए । 'बजेट एकदमै न्यून छ, आयोजनाको काम अगाडि बढाउनै समस्या भएको छ ।' सुरुमा धेरै बजेट विनियोजन भएपनि वर्षेनी बजेट कम हुँदै गएको उनले गुनासो गरे । 

सरकारले काँकडभिट्टादेखि कञ्चनपुरको गड्डाचौकी जोड्ने गरी मेची - महाकाली विद्युतीय रेलमार्ग परिकल्पना गरेर काम अगाडि बढाएको छ । 

९ सय ४५ किलोमिटरको पूर्व-पश्चिम रेलमार्गलाई जम्मा नौ खण्डमा विभाजन गरिएको छ । जसमा चार खण्ड पश्चिम र तीन खण्ड पूर्वमा पर्छ । 

र, यो पनि

‘रेल विभाग ड्राइभरविनाको बस जस्तै’ [फोटो/भिडियोसहित]

१३ वर्षमा रेल विभागमा नौ महानिर्देशक, १०औँ को पर्खाइमा

रेल्वेले मुआब्जा नदिएपछि बर्दिबासका १४ परिवारको बिचल्ली

संरक्षणको पर्खाइमा नेपालको छुक्छुके रेल

काठमाडौँ उपत्यकामा हुने धार्मिक जात्राले मेट्रो रेलको डिपिआर रद्द