टी-ट्वान्टी विश्वकपः युगान्डाविरुद्ध वेस्ट इन्डिज भारी अन्तरले विजयी

काठमाडौँ- अमेरिका र वेस्ट इन्डिजमा जारी आईसीसी पुरुष टी-ट्वान्टी क्रिकेट विश्वकपअन्तर्गत वेस्ट इन्डिजले युगान्डामाथि शानदार जित हात पारेको छ ।

समूह 'सी' अन्तर्गत आइतबार विहान भएको खेलमा वेस्ट इन्डिजले युगान्डालाई १ सय ३४ रनले पराजित गरेको हो ।

१ सय ७४ रनको लक्ष्य पछ्याएको युगान्डाले १२ ओभरमा सबै विकेट गुमाएर ३९ रनमात्र बनाउन सक्यो । युगान्डाका लागि जुमा मियागीले १३ रन जोड्नुबाहेक अन्य ब्याटरले दोहोरो अंकमा रन बनाउन सकेनन् ।

वेस्ट इन्डिजका लागि अलिक होसेनले सर्वाधिक ५ विकेट हात पारे ।

यसअघि टस जितेर पहिले ब्याटिङ गरेको वेस्ट इन्डिजले निर्धारित २० ओभरमा ५ विकेट गुमाएर १ सय ७३ रन बनायो ।

वेस्ट इन्डिजका लागि जोनसन चार्ल्सले ४४ तथा आन्द्रे रसेलले ३० रन बनाए ।