बजेटलाई प्रभावकारी बनाउने विषयमा सरकारसँग कुरा भइरहेको छ : केपी ओली

काठमाडौँ- नेकपा एमालेका अध्यक्ष केपी ओलीले बजेटलाई प्रभावकारी बनाउने विषयमा सरकारसँग कुरा भइरहेको बताएका छन् ।

शनिबार काठमाडौँमा एमाले उद्योग व्यवसाय विशेष जिल्ला कमिटीको अधिवेशन उद्घाटन गर्दै ओलीले बजेटमा देखिएका कमीकमजोरी सच्याउँदै यसलाई प्रभावकारी बनाउनका लागि आफूले सरकारसँग कुरा गरिरहेको बताएका हुन् ।

उनले उत्पादनका माध्यमबाट पुँजी वृद्धि गर्दै मुलुकलाई विकासको बाटोतर्फ अघि बढाउनुपर्नेमा जोड दिए । औद्योगिक क्षेत्र स्थापना भएपनि उद्योग बन्न नसक्नु, लगानी सम्मेलन गरे पनि लगानी भित्रिन नसक्ने अवस्थालाई अन्त्य गर्नुपर्ने उनले बताए ।

ओलीले नेपालमा थोरै लगानी र योगदान गरेर धेरै प्रतिफल बाहिर लिएर जाने अवस्थाको गम्भीतापूर्वक समीक्षा गर्नुपर्ने धारणा राखे ।

त्यस्तै नेपाल उद्योग वाणिज्य महासंघका अध्यक्ष चन्द्र ढकालले पछिल्लो समय मुलुकको आर्थिक सूचकांक हेर्दा आर्थिक अवस्था सुधार हुँदै गएको बताए । उनले आगामी मौद्रिक नीति सहज रूपमा आए यसअघिको अप्ठेरो हट्दै जाने धारणा राखे ।

उनले निजी क्षेत्रका विषयहरूलाई एकै ठाउँमा समेटेर सम्पूर्ण उद्योगी व्यवसायीको हितका लागि अघि बढ्न महासंघ तयार रहेको उल्लेख गरे ।