देउवालाई फकाउन प्रधानमन्त्री प्रचण्ड बुढानीलकण्ठमा (तस्बिरहरू)

तस्बिर : प्रधानमन्त्रीको सचिवालय

काठमाडौँ- प्रधानमन्त्री पुष्पकमल दाहाल प्रचण्ड र नेपाली कांग्रेस सभापति शेरबहादुर देउवाबीच छलफल भएको हो । आइतबार बिहान देउवालाई भेट्‌न प्रधानमन्त्री प्रचण्ड बुढानीलकण्ठ गएका थिए ।

प्रचण्ड र देउवाबीच सहकारी ठगी प्रकरणको छानबिन गर्न गठन गरिने संसदीय समितिको कार्यादेश (टिओआर) टुंगो लगाउनेबारे छलफल भएको छ ।

संसद्‌को अवरोध हटाउन राजनीतिक सहमतिका लागि देउवालाई भेट्न उनकै निवास पुगेका हुन् । देउवासँगको छलफलपछि प्रधानमन्त्री प्रचण्डले शीर्ष नेताहरूको बैठक बोलाएका छन् ।

त्यस्तै सहकारी प्रकरणलाई लिएर नेपाली कांग्रेसले संसद्‌ अवरूद्ध पार्दै आइरहेको छ । आज ११ बजे बस्‍ने संसद्‌ बैठकमा आगामी वर्षका लागि ल्याइएको नीति तथा कार्यक्रम पास गर्ने सम्भावित कार्यसूची छ ।

टिओआरमा उपप्रधान तथा गृहमन्त्री रवि लामिछानेको नाम उल्लेख गर्ने विषयमै विवाद रहेको बुझिएको छ । कांग्रेसले लामिछानेको नामको विकल्पमा गोर्खा मिडियाको प्रबन्ध निर्देशक उल्लेख गर्नुपर्ने प्रस्ताव गरेपनि सत्ता पक्ष सहमत नभएपछि टिओआरमा सहमति हुन सकेको छैन ।