सुपरदोर्दी ‘ख’ आयोजनामा पस्यो बाढी

लम्जुङ : लमजुङ दोर्दी गाउँपालिका-६ ढोडेनीमा निर्माणाधीन ५४ मेगावाट जलविद्युत् आयोजनामा दोर्दी खोलामा आएको बाढी पसेको छ । केही दिनदेखि निरन्तर परेको पानीले आज बिहान दोर्दी खोलामा बाढी आउँदा आयोजनाको बाँध भरिएर आयोजनाको सुरुङ, पार्किङ स्थललगायतका स्थानमा बाढी पसेको हो ।

आयोजनाको मुख्य सुरुङमा बाढी पस्‍न थालेपछि सुरुङभित्र काम गरिरहेका ५०/६० जना कामदारको सकुशल उद्धार गर्न सफल भएको आयोजनाले जनाएकाे छ ।  आयोजनाका साइट इन्चार्ज रमेश सिग्देलका अनुसार, आयोजनाको विभिन्न भागमा दोर्दी खोलामा आएको बाढी छिरेको छ । बाढीले आयोजना स्थलबाट एउटा ट्याक्टर, पम मेशिनलगायतका सामग्री बगाएको उनले जानकारी दिए । 

'हामी यतिबेला आयोजनाको अन्य संरचना तथा सामग्री एवं यहाँका कर्मचारी जोगाउन तयारीमा लागेका छौँ, अरु के कति क्षति पुगेको छ भन्ने विस्तृत विवरण आउन बाँकी छ' सिग्देलले भने । दोर्दीमा २०७६ साउन ८ गते पनि ठूलो बाढी आएको थियो । त्यति बेला समेत यस आयोजनामा करीब १० करोड रुपैयाँको क्षति भएको बताइएको छ ।

त्यस्तै, खोलामा बाढी ठूलो आउने क्रम जारी रहेको र सो बाढीले बाँध स्थलमा रहेको सिमेन्ट बालुवा घोल्ने ब्याटिङ प्लान्ट बगाउन लागेको आयोजनाका लेखा अधिकृत रामबहादुर काफ्लेले बताए । खोलामा असामान्य बाढी आएकाले अझै आयोजनामा क्षति हुन सक्ने उनको भनाइ छ ।

यस आयोजनामा बाढी पसेसँगै सबै निर्माणका कार्य राकिएको छ । कूल आठ अर्ब ८० करोड रुपैयाँको लगानी रहेको यस आयोजना अन्तिम चरणमा पुगेको छ । विसं २०७१ मा विद्युत् खरिद सम्झौता (पिपिए) गरी विसं २०७२ असोज महिनाबाट निर्माण थालनी हुँदै पटकपटक म्याद थप गर्दैअघि बढिरहेको छ । रासस