ताइवान भूकम्प : ठूला भवनमा क्षति (तस्बिरहरू)

काठमाडौँ- ताइवानको पूर्वी तटमा बुधबार ७.४ म्याग्निच्युडको भूकम्प गएको छ । ताइवानका अधिकारीहरूले एक जनाको मृत्यु भएको पुष्टि गरेको बीबीसीले जनाएको छ । ताइवानको राष्ट्रिय फायर एजेन्सीका अनुसार दर्जनौं घाइते भएका छन् । ठूला भवनहरूमा क्षति पुगेको छ ।

रोयटर्स समाचार एजेन्सीका अनुसार ताइवानको दमकल विभागले एक जनाको मृत्यु भएको र ५० भन्दा बढी घाइते भएको जनाएको छ ।

प्रहरीले ह्वालियनमा आंशिक रूपमा भत्किएको भवनबाट कम्तीमा नौ जनालाई उद्धार गरेको छ र पाँच जना अझै पनि उद्धारका लागि पर्खिरहेको टिभिबिएसले जनाएको छ ।

 भूकम्पको केन्द्र ताइवानको हुआलियन सहरबाट १८ किलोमिटर (११ माइल) दक्षिणमा रहेको छ ।

भूकम्प मापन अधिकारीहरूका अनुसार यो ताइवानमा २५ वर्षयताकै शक्तिशाली भूकम्प हो ।

सन्‌ १९९९ मा ताइवानमा ७.७ म्याग्निच्युडको भूकम्पले २४ सय मानिसको ज्यान लिएको बीबीसीले जनाएको छ । त्यस्तै उक्त भूकम्पले पाँच हजार भवन ध्वस्त पारेको थियो । त्यस्तै सन्‌ २०१८ मा पनि ६.२ म्याग्निच्युडको भूकम्प गएको थियो ।

तस्बिरहरू : रोयटर्स, मिरर र टिभिबिएस​​