राष्ट्रिय क्रिकेट : नेपाल पुलिसको लगातार छैटौँ जित

काठमाडौँ- पीएम कप राष्ट्रिय क्रिकेट प्रतियोगितामा नेपाल पुलिस क्लबले लगातार छैटौँ जित हात पारेको छ ।

कीर्तिपुरस्थित त्रिवि क्रिकेट मैदानमा शुक्रबार भएको खेलमा कर्णाली प्रदेशलाई ६ विकेटले पराजित गर्दै पुलिसले लगातार छैटौँ जित हात पारेको हो । कर्णालीको भने यो सात खेलमा चौँथोँ पराजय हो ।

शुक्रबारको खेलमा १ सय ७२ रनको लक्ष्य पुलिसले २३ ओभर ४ बलमा ४ विकेट गुमाउँदै पूरा गर्‍यो । पुलिसको जितमा दिलिप नाथले सर्वाधिक ७५ रन तथा कुशल भुर्तेलले ४३ र कप्तान दिपेन्द्र सिंह ऐरीले ३४ रन बनाए ।

कर्णालीका लागि प्रकाश जैसीले २ तथा दिवान पुन र दिपेन्द्र रावलले १-१ विकेट हात पारे ।

यसअघि टस जितेर पहिले ब्याटिङ गर्ने निर्णय गरेको कर्णालीले ४२ ओभर ५ बलमा सबै विकेट गुमाउँदै १ सय ७१ रन बनायो ।

कर्णालीका लागि निश्चल रावलले ५० तथा कप्तान रविन्द्र शाहीले ४० रन बनाए । अर्जुन घर्तीले २३ रन जोडे ।

पुलिसका लागि सागर ढकालले ३ तथा ललित भण्डारीले २ विकेट हात पार्दा दिपेन्द्र सिंह ऐरी, ललित राजवंशी र कुशल भुर्तेलले १-१ विकेट हात पारे ।