राष्ट्रिय क्रिकेट : मधेशलाई हराउँदै पुलिसले दर्ता गर्‍यो लगातार पाँचौं जित

तस्बिरः क्यान

काठमाडौँ- पीएम कप राष्ट्रिय क्रिकेट प्रतियोगितामा नेपाल पुलिस क्लबले लगातार पाँचौं जित हात पारेको छ ।

काठमाडौँको मुलपानी क्रिकेट मैदानमा बुधबार भएको खेलमा मधेशलाई ६ विकेटले पराजित गर्दै पुलिसले लगातार पाँचौं खेल जितेको हो ।

मधेशको भने सात खेलमा यो तेस्रो पराजय हो । उसले चार खेलमा जित हात पारेको छ ।  

बुधबारको खेलमा ९७ रनको सामान्य लक्ष्य पुलिसले १८ ओभर ३ बलमा ४ विकेटको क्षतिमा पूरा गर्‍यो ।

पुलिसलाई जित दिलाउन सुनिल धमलाले २८ रन तथा कुशल भुर्तेलले १९ रनको योगदान गरे । अमित श्रेष्ठले १५ तथा आरिफ शेखले १६ रन बनाए ।

मधेशका लागि अरनिको यादव र रंजित कुमारले समान २-२ विकेट हात पारे ।

यसअघि टस हारेर पहिले ब्याटिङ गरेको मधेशले २४ ओभरभित्रै सबै विकेट गुमाएर ९६ रनमात्र बनाउन सक्यो ।

मधेशका लागि अरनिको यादवले २३ रन तथा कप्तान हरिशंकर शाहले २२ रन बनाए । मधेशको इनिङ्स धराशायी बनाउन पुलिसका सागर ढकालले ५ तथा ललित राजवंशीले ४ विकेट र राशिद खानले १ विकेट हात पारे ।