महिला राष्ट्रिय क्रिकेट : बागमतीले तेस्रो जित हात पार्दा मधेशको चौथो हार

काठमाडौँ- पीएम कप महिला राष्ट्रिय क्रिकेट प्रतियोगिताअन्तर्गत बागमती प्रदेशले तेस्रो जित हात पार्दा मधेश प्रदेशले भने चौथो पराजय भोगेको छ ।

कीर्तिपुरस्थित त्रिवि क्रिकेट मैदानमा बुधबार भएको खेलमा लुम्बिनी प्रदेशलाई ९ रनले पराजित गर्दै बागमतीले ५ खेलमा तेस्रो जित दर्ता गरेको हो । लुम्बिनीको भने यो तेस्रो पराजय हो ।

बुधबार बागमतीले दिएको १ सय १० रनको लक्ष्य पछ्याएको लुम्बिनीले निर्धारित २० ओभरमा ८ विकेट गुमाएर १ सय रन बनायो ।

यसअघि टस जितेर पहिले ब्याटिङ गरेको बागमतीले ८ विकेटको क्षतिमा १ सय ९ रन जोडेको थियो ।

मुलपानी क्रिकेट मैदानमा भने सुदूरपश्चिम प्रदेशले मधेश प्रदेशलाई ५ विकेटले पाखा लगायो । प्रतियोगितामा सुदूरपश्चिमको यो चौथो जित हो भने मधेशको चौथो हार हो ।

बुधबार मधेशले दिएको ८३ रनको लक्ष्य सुदूरपश्चिम प्रदेशले १९ ओभर ५ बलमा ५ विकेट गुमाउँदै पूरा गर्‍यो । यसअघि टस जितेर पहिले ब्याटिङ गर्ने निर्णय गरेको मधेशले निर्धारित २० ओभरमा ७ विकेटको क्षतिमा ८२ रन बनायो ।