कैलालीमा ३१ गतेसम्म थपियो निषेधाज्ञा

फाइल फोटो

धनगढी : कैलालीमा जारी निषेधाज्ञा लम्बिएको छ। जिल्ला कोभिड–१९ संकट व्यवस्थापन केन्द्रको बैठकले बैशाख १६ गतेदेखि थप्दै आएको निषेधाज्ञा जेठ ३१ गतेसम्म जारी राख्ने सिफारिस गरेपछि प्रशासनले निर्णय गरेको कार्यालयका सूचना अधिकारी शिवराज जोशीले बताए ।

उनका अनुसार यो अवधिमा बैंक तथा वित्तीय संस्थाहरु बिहान ७ बजेदेखि दिउँसो ११ बजेसम्म ५० प्रतिशत मात्र कर्मचारीको उपस्थितीमा जनस्वास्थ्यका मापदण्डहरुको कडाइका साथ पालना गरी सञ्चालन गर्न सकिने छ ।

यस्तै तरकारी, फलफूल, खाद्यान्न, दूध डेरी, मासु, खानेपानी, ग्याँस पसलहरु, किराना पसल र डिपार्टमेन्टल स्टोर आइतबार, मंगलबार, विहीबार र शनिबार बिहान ७ बजेदेखि बिहान १० बजेसम्म खुला गर्न पाउने निर्णय भएको छ ।

त्यस्तै विवाह व्रतबन्धको हकमा बढीमा ७ जनासम्म सहभागी हुने, त्यसैगरी अत्यावश्यक सामग्री बोकेका ढुवानीका सवारी साधन, विरामी तथा कुरुवा बढीमा २ जना बोकेका एम्बुलेन्स, स्वास्थ्यकर्मी, पशु स्वास्थ्यकर्मी तथा सुरक्षा निकायले प्रयोग गर्ने सवारी साधनबाहेक अन्य सार्वजनिक एवम् निजी सवारी साधन सञ्चालनमा रोक लगाउने निर्णय समेत भएको सूचना अधिकारी जोशीले जानकारी दिए ।