बिहीबार २५ बैशाख, २०८२
Thursday, May 08, 2025

समृध्दि नचाहने तत्व सरकारविरुध्द लागे : प्रधानमन्त्री ओली

ताप्लेजुङ: प्रधानमन्त्री केपी शर्मा ओलीले सरकारविरुध्द भइरहेका भ्रमपूर्ण प्रचारको पछि नलाग्‍न सबैमा आग्रह गरेका छन्। वर्तमान सरकारको लोकप्रियतालाई देखेर आत्तिएका विभिन्‍न पक्षले सरकार परिवर्तन हुँदैछ भन्‍ने जस्ता नकारात्मक सन्देश फैलाएको जनाउँदै  उनले यस प्रकारका हल्लाको पछि नलाग्‍न आग्रह गरे । 

फक्ताङलुङ गाउँपालिका– ६ घुन्सामा स्थापित सामुदायिक स्वास्थ्य एकाइ भवनको आज उद्घाटन गर्दै उनले सरकार मुलुकको समृध्दिका लागि चौतर्फीरुपमा लागिपरेको जनाउँदै देशको समृध्दि नचाहने मान्छे विभिन्न तत्व सरकारविरुद्ध लागेको बताए। ‘हामी समृध्दिका लागि अघि बढिरहेका छौँ तर केही पक्ष लोकतान्त्रिक प्रणालीविरुध्द भ्रम फैलाइरहेका छन्, यो कार्य त्रुटिपूर्ण हो’, प्रधानमन्त्री ओलीले भने । 

अर्को प्रसङ्गमा उनले छिमेकी मुलुकसँगको सम्बन्धलाई सुदृढ गर्ने नीति सरकारले लिएको बताए । छिमेकी भारतद्वारा मिचिएको भूमि फिर्ता लिन गर्न गरेको प्रयास,  भारत र चीन दुवैसँगको सम्बन्धलाई अझ सुधार, बन्द नाका खोल्ने जस्ता कार्यले वर्तमान सरकार सफल हुँदै गएको उनको भनाइ थियो । 

उनले घुन्सा जस्तो दुर्गम गाउँ आगामी तीन वर्षमा नै सुगममा परिणत हुने बताउँदै यस क्षेत्रको विकासका लागि यातायातलगायत पूर्वाधार निर्माणमा सरकारले सहयोग गर्ने प्रतिबध्दता व्यक्त गरे । रासस