मकवानपुरमा स्कुटर दुर्घटना हुँदा एक जनाको मृत्यु

मकवानपुर- मकवानपुरको भीमफेदी गाउँपालिकामा स्कुटर दुर्घटना हुँदा एक जनाको मृत्यु भएको छ ।

मकवानपुर प्रहरीका अनुसार असोज ८ गते बुधबार बेलुका भिमफेदी ६ जुरीखेतस्थित भीमफेदी कुलेखानी काठमाडौँ सडक खण्डमा काठमाडौँ तर्फबाट हेटौंडा तर्फ आउँदै गरेको बागमती प्रदेश ०२-०२७ प ४८४२ नम्बरको स्कुटर आफैँ अनियन्त्रित भई दुर्घटना हुँदा काठमाडौँ-२७ महाबौद्ध बस्ने ६५ वर्षीय शसिराज पाण्डे र उनकी श्रीमती ६२ वर्षीया राज्यश्री थापा क्षेत्री घाइते भएका थिए ।

घाइते दुवै जनालाई उपचारका लागि हेटौंडा अस्पताल ल्याइएकोमा राज्यश्री थापालाई बेलुका ७:२० बजे डाक्टरले मृत घोषणा गरेको मकवानपुर प्रहरी प्रवक्ता लक्ष्मी भण्डारीले जानकारी दिए ।

घाइते भएका पाण्डे र थापालाई सडकबाट ५०/६० मिटर तलबाट उद्धार गरिएको प्रहरीले जानकारी दिएको छ । स्कुटर सडकबाट करिब १ सय मिटर तल खसेको साथै स्कुटरको नम्बर घाइते पाण्डेले जानकारी गराएको भण्डारीले बताए ।