क्रिकेट विश्वकपः जितविहीन रहेका अस्ट्रेलिया र श्रीलंका भिड्दै

काठमाडौँ- भारतमा जारी आईसीसी एकदिवसीय क्रिकेट विश्वकपअन्तर्गत आज जितविहीन रहेको अस्ट्रेलिया र श्रीलंकाबीच खेल हुँदैछ ।

अस्ट्रेलिया र श्रीलंकाबीचको खेल लखनऊस्थित भारत रत्न श्री अटल बिहारी बाजपेयी एकाना क्रिकेट स्टेडियममा नेपाली समयअनुसार दिउँसो २:१५ बजेबाट सुरु हुनेछ ।

जारी विश्वकपमा श्रीलंका र अस्ट्रेलियाले यसअघि खेलेका दुवै खेलमा पराजय भोगिसकेका छन् । त्यसैले आजको खेलमा दुवै टोली पहिलो जितको खोजीमा हुनेछन् ।

यसअघि आइतबार भएको खेलमा अफगानिस्तानले साविक विजेता इंग्ल्यान्डलाई ६९ रनले पराजित गरेको थियो ।

अफगानिस्तानले दिएको २ सय ८५ रनको लक्ष्य पछ्याएको इंग्ल्यान्डले ४० ओभर ३ बलमा सबै विकेट गुमाएर २ सय १५ रनमात्र बनाउन सक्यो ।