इजरायलमा रहेका नेपालीहरूलाई घरबाहिर ननिस्कन दूतावासको आग्रह

काठमाडौँ - इजरायलस्थित नेपाली दूतावासले इजरायलमा रहेका नेपालीहरूलाई घर बाहिर ननिस्कन आग्रह गरेको छ । आज एक सूचना जारी गर्दै दूतावासले पछिल्लो समय गाजा आसपाससहित इजरायलको दक्षिणी तथा उत्तरी सीमा क्षेत्रमा जोखिम थप बढेकोले स्थिति सामान्य नबन्दासम्म घरबाहिर ननिस्कन र सुरक्षित स्थानमा रहन विशेष अनुरोध गरेको हो ।

'इजरायल सरकारद्वारा ती क्षेत्रमा रहेकाहरूलाई सुरक्षित क्षेत्रतर्फ जान सुझाइएकोले  यदि तपाइँ रहेको क्षेत्रमा समेत असुरक्षा बढ्दै गएको स्थिति छ भने आफ्नो रोजगारदातासँग सल्लाह गरी त्यहाँबाट बढी सुरक्षित स्थानतर्फ सर्नुहोला,' दूतावासले जारी गरेको  विज्ञप्तिमा भनिएको छ।

स्वदेश फर्कन चाहनेहरूले दूतावासबाट सुरु गरिएको अनलाइन रजिष्ट्रेशन फर्म अनिवार्य रुपमा भर्न र निश्चित रोजगारदाता नभएका नेपाली नागरिकहरूले पनि उल्लेखित अनलाइन फर्म भर्न सूचनामार्फत अनुरोध गरिएको छ । 

सुरक्षित आश्रयस्थल नभएकाहरूले दूतावासमा जानकारी गराउन भनिएको छ ।