भारतीय प्रधानमन्त्री नरेन्द्र मोदीको कालापानी भ्रमणबारे सांसदले उठाए प्रश्न

काठमाडौँ- राष्ट्रिय प्रजातन्त्र पार्टीका सांसद दीपकबहादुर सिंहले छिमेकी देशका प्रधानमन्त्री बिनाजानकारी नेपाली भूमिमा आउँदा पनि सरकार टुलुटुलु हेरेर बसिरहेको बताएका छन् ।

बिहीबार प्रतिनिधि सभाको बैठकपछि सञ्चारकर्मीहरूसँग कुराकानी गर्दै सांसद सिंहले छिमेकी देश भारतका प्रधानमन्त्री नरेन्द्र मोदी नेपाली भूमिमा बिनाजानकारी आउँदा पनि सरकार टुलुटुलु हेरेर बसिरहेको बताएका हुन् । उनले यसमा सरकारको नालायकीपन देखिएको जिकिर गरे । सरकार विदेशी प्रधानमन्त्रीको नेपाल भ्रमण हुँदा समेत लाचार भएको बताए । उनले आफू राष्ट्रिय प्रजातन्त्र पार्टी कोशी प्रदेशमा सरकारमा जानु नहुने पक्षमा रहेको बताए ।

नेकपा एमालेका सांसद ठाकुर गैरेले भारतीय प्रधानमन्त्री नरेन्द्र मोदीले मर्यादालाई उल्लंघन गरेर नेपाली भूमि कालापानी क्षेत्रको भ्रमण गरेको बताए । उनले भारतीय प्रधानमन्त्री मोदीले सामान्य शिष्टाचार र कूटनीतिक मर्यादाविपरीत कालापानी क्षेत्रको भ्रमण गरेको बताएका हुन् । उनले मोदीको यस प्रकारको भ्रमणलाई सही भन्न नसकिने बताए । उनले भारतीय प्रधानमन्त्रीको भ्रमण नेपाल भारत सम्बन्धको विपरीत रहेको बताए । उनले कालापानी नेपाली भूमि भएकाले त्यहाँबाट भारतीय सेना फिर्ता हुनुपर्ने भनाइ राखे । 

नेकपा (माओवादी केन्द्र) का सांसद माधव सापकोटाले नेपालले कूटनीतिक सक्रियता र भूमिकालाई बढाउनु जरुरी रहेको बताए । उनले भारतीय प्रधानमन्त्री नरेन्द्र मोदी नेपालको कालापानी क्षेत्रमा आएको कुरालाई उल्लेख गर्दै यसले छिमेकी देशलाई विश्वासमा लिँदै कूटनीतिक सक्रियता बढाउनु जरुरी देखिएको जिकिर गरे । उनले बरोजगारीका कारण युवाहरूमा असन्तुष्टि र निराशा बढेको भन्दै रोजगारी सिर्जना गर्न नीति निर्माणको तहबाट आफूहरू भूमिका खेल्न तयार रहेको बताए । उनले कोशी प्रदेशमा देखिएका समस्या नयाँ मुख्यमन्त्री निर्वाचित भएसँगै समाधान हुने विश्वास व्यक्त गरे ।

नेपाली कांग्रेसका सांसद रामहरी खतिवडाले भारतीय प्रधानमन्त्री नरेन्द्र मोदीको महाकाली क्षेत्रको भ्रमण औपचारिक भ्रमण नभएकाले चासो लिनुपर्ने आवश्यकता नभएको बताए । उनले राजकीय भ्रमणका रूपमा नेपाली भूमिमा आएको भए सम्मान र सत्कार गर्नुपर्ने भन्दै उनले व्यक्तिगत भ्रमणका बारेमा जानकारी गराउनु नगराउनु उनीहरूकै कुरा भएको बताए । उनले नेपाल–भारतबीचमा रहेका समस्याहरूलाई कूटनीतिक माध्यमबाट समाधान गर्नुपर्ने पनि बताए ।

खतिवडाले राष्ट्रिय प्रजातन्त्र पार्टी सातै प्रदेश सरकार र संघीय सरकारमा पनि आउने विश्वास व्यक्त गरे ।