नेपालमा ५० वर्षभन्दा माथिका २० प्रतिशत जनसंख्यामा दृष्टि कमजोर

काठमाडौँ- नेपालमा ५० वर्षभन्दा माथिका जनसंख्याको २० प्रतिशत जनसंख्यामा दृष्टि कमजोर रहेको पाइएको छ । विश्व दृष्टि दिवसका सन्दर्भमा मंगलबार काठमाडौँमा गरेको एक कार्यक्रमको आयोजना गर्दै तिलगंगा आँखा प्रतिष्ठानले पछिल्लो अनुसन्धान अनुसार नेपालमा ५० वर्षमाथिका २० प्रतिशतमा दृष्टि कमजोर पाइएको जनाएको हो ।

त्यस्तै दृष्टिविहीन गराउने रोगहरूमा मोतियाविन्दु नै पहिलो कारण रहेको प्रतिष्ठानले जनाएको छ । कार्यक्रममा चिकित्सकहरूले चस्माको जाँच तथा प्रयोग पर्याप्त नहुनाले गर्दा दृष्टि दोष मुख्य समस्याका रूपमा रहेको समेत जानकारी दिएका छन् । पुरुषको तुलनामा महिला दृष्टिविहीनता बढेको र नेपालको अपाङ्गताहरूमा दृष्टिगत अपाङ्गता मुख्य रहेको तिलंगगा अस्पतालका डा सृजना अधिकारीले बताइन् । पाँच जना दृष्टिविहीन बालबालिका मध्ये उपचार पाए ४ जनाको दृष्टि फिर्ता ल्याउन सकिने भए पनि समयमा नै उपचार हुन नसकेको उनले बताए ।

त्यस्तै तिलगंगा आँखा प्रतिष्ठानका प्रमुख कार्यकारी अधिकृत तथा वरिष्ठ नेत्र विशेषज्ञ डा रिता गुरुङले अहिले मुलुकभरका स्वास्थ्य संस्थामा आँखा सम्बन्धी चिकित्सकहरूको कमी नभएको बताइन् ।

अक्टोबर महिनाको दोश्रो बिहीबारका दिनलाई आँखा स्वास्थ्य सचेतनामूलक कार्यक्रमको आयोजना गर्दै प्रतिष्ठानले विश्व दृष्टि दिवस मनाउँदै आएको छ । यस वर्षको विश्व दृष्टि दिवस 'कार्यस्थलमा आँखालाई माया गरौँ' भन्ने नारासहित मनाइँदै छ ।