दृष्टिविहीन-बहिरा बालबालिकालाई दसैँ खर्च

काठमाडौँ- दृष्टिविहीन-बहिरा बालबालिकाका लागि दसैँ खर्चवापत १० परिवारलाई आर्थिक सहयोग वितरण गरिएको छ । विगत लामो समयदेखि जर्मनमा व्यवसाय गर्दै आएका सोलुखुम्बु दूधकुण्ड नगरपालिका वडा नं ७ का कर्मा शेर्पाले सिनामंगलमा सञ्चालनमा गरेको श्रवण दृष्टिविहीन श्रोत केन्द्रमा पुगेर १० परिवारका बालबालिकालाई १ लाख रुपैयाँ हस्तान्त्ररण  गरेका हुन् ।

दुई वटा इन्द्रीय सम्बन्धी अपाङ्गता भएका बालबालिकाहरूलाई एकत्रित गराई विगत २०६२ सालदेखि सञ्चालनमा रहेको श्रवण दृष्टिविहीन श्रोत केन्द्र बहिरा-दृष्टिविहीन अभिभावक समाजले सञ्चालन गर्दै आइरहेको छ । 

विशेष गरेर विपन्न र गरिब परिवारमा समय पुगेर वा समय अगावै प्राकृतिक रूपमा जन्मेका बालबालिकालाई लक्षित गरी खोलिएको यस श्रोत केन्द्रमा जन्मजातै बोल्न, सुन्न र देख्न नसक्ने बालबालिकाहरूका लागि दैनिक स्पर्श शिक्षा, फिजियोथेरापी र अभिभावकलाई मनोपरामर्श सेवा प्रदान गर्दै आएको समाजका अध्यक्ष ल्हाक्पा नुरु शेर्पाले जानकारी दिए ।

यस श्रवण दृष्टिविहीन श्रोत केन्द्रमा २० जना बालबालिका रहेका छन् ।