गण्डकीमा विषयगत समितिका सभापति निर्विरोध

पोखरा- गण्डकी प्रदेश सभामा विषयगत चारवटै समिति सभापति निर्विरोध चयन भएका छन् ।

शनिबार मनोनयनको समयभित्र सबै समितिको सभापतिमा एकल उम्मेदवारी परेको संसद् सचिवालयका उपसचिव प्रेम सुवेदीले जानकारी दिए । शनिबार बिहान ११ बजेदेखि दिउँसो ४ बजेसम्म समय तोकिएको थियो । सार्वजनिक लेखा समितिमा एमालेका सुधीरकुमार पौडेल, अर्थ तथा विकासमा कांग्रेसका भोजराज अर्याल, प्रदेश मामिला तथा कानुन समितिमा कांग्रेसकै चम्पादेवी खड्का र सामाजिक विकास तथा कृषि समितिमा माओवादीका फणिन्द्र देवकोटाको एकल उम्मेदवारी परेको छ ।

उनीहरूको शपथ आइतबार बिहानका लागि तय गरिएको छ । उनीहरूले आइतबारबाटै गाडी सुविधा पाउने छन् । गण्डकी प्रदेश सभामा ४ वटा संसदीय समिति छन् । ६० सदस्यीय प्रदेश सभाका ३ वटामा १५/१५ जना र एउटामा १३ जना राखिएको छ । ४ मध्ये २ समिति कांग्रेस, १ माओवादी र १ एमालेको भागमा परेको हो ।