त्रिदेशीय सिरिजः पीएनजीले मलेसियालाई हरायो

काठमाडौँ- मलेसियामा जारी त्रिदेशीय टी-ट्वान्टी क्रिकेट सिरिजअन्तर्गत पपुवा न्यूगिनी (पीएनजी) ले घरेलु टोली मलेसियामाथि शानदार जित हात पारेको छ ।

क्वालालम्पुरमा बुधबार भएको खेलमा पीएनजीले मलेसियालाई ४५ रनले पराजित गरेको हो ।

१ सय ५३ रनको लक्ष्य पछ्याएको पीएनजीले ९ ओभर ४ बलमा १ विकेट गुमाएर १ सय ८ रन बनाउँदा वर्षाका कारण खेल पूरा हुन सकेन ।

त्यपछि डीएल मेथडअनुसार पीएनजीले ९ ओभर ४ बलमा ६४ रनको लक्ष्य पाएपनि उसले १ सय ८ रन बनाएका कारण ४५ रनको जित हात पारेको हो ।

पीएनजीको जितमा टोनी उराले ३३ बलमा ६ चौका र ४ छक्काको मदतमा ६२ रन तथा कप्तान असाद भालाले ३८ रन बनाए ।

यसअघि टस जितेर पहिले ब्याटिङ गरेको मलेसियाले निर्धारित २० ओभरमा ९ विकेट गुमाएर १ सय ५२ रन बनायो ।

मलेसियाका लागि कप्तान अहमद फैजले सर्वाधिक ४९ रन बनाउँदा पीएनजीका अलेइ नाओले सर्वाधिक ३ विकेट हात पारे ।