इंग्ल्यान्डले जित्यो न्यूजिल्यान्डविरुद्धको सिरिज

काठमाडौँ- घरेलु टोली इंग्ल्यान्डले न्यूजिल्यान्डविरुद्धको चार खेलको एकदिवसीय सिरिज ३-१ ले जितेको छ ।

शुक्रबार राति लर्ड्समा भएको चौँथो तथा अन्तिम खेल एक सय रनले जित्दै इंग्ल्यान्डले सिरिजमाथि कब्जा जमाएको हो ।

शुक्रबार राति ३ सय १२ रनको लक्ष्य पछ्याएको न्यूजिल्यान्डले ३८ ओभर २ बलमा सबै विकेट गुमाएर २ सय ११ रनमात्र बनाउन सकेपछि घरेलु टोलीले सहजै जित हात पारेको हो ।

विशाल लक्ष्य पछ्याउने क्रममा न्यूजिल्यान्डका राचिन रविन्द्रले सर्वाधिक ६१ रन बनाए । इंग्ल्यान्डका लागि मोइन अलीले सर्वाधिक ४ विकेट हात पारे ।

यसअघि टस जितेर पहिले ब्याटिङ गरेको इंग्ल्यान्डले निर्धारित ५० ओभरमा ९ विकेट गुमाउँदै ३ सय ११ रन बनायो । इंग्ल्यान्डका लागि डाविड मलनले सर्वाधिक १ सय २७ रनको योगदान गरे ।

न्यूजिल्यान्डका लागि राचिन रविन्द्रले सर्वाधिक ४ विकेट लिए ।