एकदिवसीय सिरिजः अस्ट्रेलियाविरुद्ध दक्षिण अफ्रिकाको शानदार जित

काठमाडौँ- अस्ट्रेलियाविरुद्धको पाँच खेलको एकदिवसीय सिरिजको चौँथो खेलमा घरेलु दक्षिण अफ्रिकाले शानदार जित हात पारेको छ ।

शुक्रबार राति सेन्चुरियनमा भएको खेलमा दक्षिण अफ्रिकाले पाहुना टोली अस्ट्रेलियालाई १ सय ६४ रनले पराजित गरेको हो । यससँगै सिरिज २-२ को अवस्थामा पुगेको छ ।

शुक्रबार रातिको खेलमा ४ सय १७ रनको लक्ष्य पछ्याएको अस्ट्रेलियाले ३४ ओभर ५ बलमा सबै विकेट गुमाएर २ सय ५२ रनमात्र जोड्न सक्यो ।

अस्ट्रेलियाका लागि अलेक्स क्यारीले सर्वाधिक ९९ रन बनाए । दक्षिण अफ्रिकाका लुङ्गी एनगिडीले ४ तथा कागिसो रबाडाले ३ विकेट हात पारे ।

यसअघि टस हारेर पहिले ब्याटिङ गरेको दक्षिण अफ्रिकाले निर्धारित ५० ओभरमा ५ विकेट गुमाएर ४ सय १६ रन जोड्यो ।

दक्षिण अफ्रिकाका लागि हेनरिच क्लासेनले ८३ बलमा समान १३ चौका र १३ छक्का प्रहार गर्दै १ सय ७४ रन बनाए । डेभिड मिलरले ८२ तथा रास्सी भान डेरले ६२ रनको योगदान गरे ।

अस्ट्रेलियाका लागि जोश ह्याजलउडले सर्वाधिक २ विकेट हात पारे ।