डेभोन र डेरिलको शतकमा इंग्ल्यान्डमाथि न्यूजिल्यान्डको शानदार जित

काठमाडौँ- घरेलु टोली इंग्ल्यान्डविरुद्धको चार खेलको एकदिवसीय सिरिजको पहिलो खेलमा न्यूजिल्यान्डले शानदार जित हात पारेको छ ।

शुक्रबार राति कार्डिफमा भएको खेलमा न्यूजिल्यान्डले इंग्ल्यान्डलाई ८ विकेटले पराजित गरेको हो ।

जितका लागि चाहिएको २ सय ९२ रनको लक्ष्य न्यूजिल्यान्डले ४५ ओभर ४ बलमा २ विकेट गुमाएर पूरा गर्‍यो ।

न्यूजिल्यान्डको जितमा डेरिल मिचेलले अविजित १ सय १८ रन तथा डेभोन कनवेले १ सय ११ रन बनाए ।

इंग्ल्यान्डका लागि डेभिड विल्ली र आदिल राशिद एक-एक विकेट हात पारे ।

यसअघि टस हारेर पहिले ब्याटिङ गरेको इंग्ल्यान्डले निर्धारित ५० ओभरमा ६ विकेट गुमाएर २ सय ९१ रन जोड्यो ।

इंग्ल्यान्डका लागि कप्तान जोश बट्लरले ७२ रन, डाविड मिलानले ५४ तथा बेन स्टोक्स र लियाम लिभिङ्स्टोनले समान ५२-५२ रन बनाए ।

न्यूजिल्यान्डका लागि राचिन रविन्द्रले ३ तथा टिम साउथीले २ विकेट हात पारे ।