डेब्यू खेलमै गोल गर्दै मेस्सीले दिलाए मियामीलाई जित

काठमाडौँ- अर्जेन्टिनी फुटबल स्टार लियोनल मेस्सीले मेजर लिग सकरको डेब्यू खेलमा गोल गर्दै अमेरिकी क्लब इन्टर मियामीलाई जित दिलाउन सफल भएका छन् ।

न्यू जर्सीको रेड बुल एरिनामा आइतबार बिहान भएको खेलमा न्यूयोर्क रेड बुल्सलाई २-० ले पराजित गर्दै मियामीले जित हासिल गर्यो ।

डिएगो गोमेजले खेलको ३७ औँ मिनेटमा गोल गर्दै मियामीलाई सुरुवाती अग्रता दिलाएका थिए ।

खेलको ६० औँ मिनेटमा मेस्सी र सर्जियो बुस्केट्सले मियामीका लागि मेजर लिग सकरमा डेब्यू गरेका थिए । डेब्यू गरेको ३० मिनेट भित्रै अर्थात खेलको ८९ औँ मिनेटमा मेस्सीले मियामीका लागि दोस्रो गोल गरे ।

यस जितसँगै मियामी तालिकको १४ औँ स्थानमा उक्लिएको छ । उसको २३ खेलमा २१ अंक रहेको छ ।