हिमाल सफा गर्दा सेनाले फेला पार्‍यो दुई शव

तस्बिर : नेपाली सेना

काठमाडौँ : नेपाली सेनाले 'सफा हिमाल अभियान २०११' कार्यक्रम अन्तर्गत फेला पारेको एक अमेरिकी नागरिकसहितको दुई शव काठामाडौँ ल्याएको छ । सेनाले दुई वर्ष अगाडि सगरमाथा आरोहणपछि फिर्ता हुने क्रममा मृत्यु भएका अमेरिकी नागरिक ६२ वर्षीय क्रिष्टोफर कुलीश र पहिचान नखुलेको शव वैशाख २९ र ३१ गते ढुंगाको चेपमा फेला पारेको थियो ।

'सफा हिमाल अभियान २०११' डेट बडी रिकभरी टीमले उक्त शवहरू गत वैशाख ३० गते र जेठ ९ गते दोस्रो शिविरबाट ल्याउन सफल भएको नेपाली सेनाको मुख्यालयले जनाएको छ । सेनाले प्रहरीको मुचुल्कासहित दुई शव व्यवस्थापनका लागि सोमबार त्रिवि शिक्षण अस्पतालमा बुझाएको छ ।

त्यसैगरी 'सफा हिमाल अभियान २०११' अन्तर्गत विभिन्न ६ हिमालबाट २६ हजार ९ सय २७ किलो ग्राम फोहोर संकलन गरेको छ । पुनः प्रयोगमा ल्याउन मिल्‍ने १० हजार ९ सय १० किलोग्राम फोहोर सम्बन्धित निकायलाई हस्तान्तरण गरेको मुख्यालयले जनाएको छ ।