लम्पी स्किन नियन्त्रणका लागि ४७ करोड रुपैयाँ रकम विनियोजन गरिएको छ : मन्त्री भुसाल

काठमाडौँ- कृषि तथा पशुपन्क्षी विकासमन्त्री डा.वेदुराम भुसालले लम्पी स्किन रोगको महामारी नियन्त्रणका लागि ४७ करोड रुपैयाँ रकम विनियोजन गरेको बताएका छन् । 

बिहीबार प्रतिनिधि सभा बैठकमा बोल्दै मन्त्री भुसालले चालु आर्थिक वर्षमा महामारी नियन्त्रणका लागि प्रत्येक स्थानीय तहमा संघीय सशर्त अनुदान अन्तर्गत जाने गरी ४७ करोड रुपैयाँ विनियोजन गरिएको जानकारी गराएका हुन् ।

त्यस्तै महामारी नियन्त्रणका लागि खोप कार्यक्रम सञ्चालन गर्न ५ करोड ६० लाख रुपैयाँ रकम विनियोजन गरिएको जिकिर गरे । उनले प्रदेशहरूले पनि खोप खरिदका लागि बजेट विनियोजन गरेका र कतिले विनियोजन गर्ने प्रक्रिया अगाडि बढाएका बताए ।

मन्त्री भुसालले विगत ५ महिनामा लम्पी स्किन रोगबाट १४ लाख ४६ हजार ४५९ पशु बिरामी परेका बताए । त्यसमध्ये १२ लाख ८८ हजार ७५९ निको भएका र ५२ हजार ४४८ पशुको मृत्यु भएको जानकारी गराए । हाल १ लाख ५ हजार २५३ पशु बिरामी अवस्थामा रहेका उल्लेख गरे । उनले हालसम्म जोर्डन, तान्जानिया र टर्कीबाट १३ लाख ६९ हजार डोज भ्याक्सिन ल्याएकोमा ७ लाख ६ हजार ४०० पशुमा भ्याक्सिन लगाइ सकिएको बताए ।

लम्पी स्किन रोग नियन्त्रणका लागि तीनै तहका सरकारबीच समन्वयमा काम भइरहेको बताए । आवश्यक प्रचारप्रसारको काम पनि भइरहेको उनले स्पष्ट पारे । आवश्यक पशु चिकित्सक पनि खटाइएको उनले जानकारी दिए ।