'दोस्रो लहरको कोभिड फैलिएपछि करिब २ अर्बको स्वास्थ्य सामग्री पायौँ'

काठमाडौँ : स्वास्थ्य तथा जनसंख्या मन्त्री हृदयेश त्रिपाठीले नेपालमा दोस्रो लहरको कोभिड-१९ को संक्रमण फैलिएपछि राष्ट्रिय तथा अन्तरराष्ट्रिय संस्थाहरूबाट करिब दुई अर्ब रकम बराबरको स्वास्थ्य सामग्री तथा उपकरण प्राप्‍त भएको बताएका छन् ।      

सोमबार मन्त्रालयमा भएको भर्चुअल पत्रकार सम्मेलनमा सरकारको आह्‍वान पश्‍चात चीन, स्पेन, स्वीजरल्याण्ड, अमेरिका, बंगलादेश सरकार लगायतका विभिन्‍न संघसंस्थाहरूबाट स्वास्थ्य सामग्री तथा उपकरणहरू सहयोग प्राप्‍त भएको उनले बताए ।

उनका अनुसार चीनबाट दुई हजार थान अक्सिजन सिलिन्डर, तिब्बतबाट एक सय ५० थान लिक्‍वीड अक्सिजन ट्यांक, स्पेनबाट १५ भेन्टिलेटर, १० अक्सिजन कन्सन्ट्रेटर र एक लाख २४ हजार एन्टिजेन्ट कीट, स्वीजरल्याण्डबाट ११ लाख एन्टीजेन्ट कीट, ४० भेन्टीलेटर, १० अक्सिजन कन्सन्ट्रेटर, बंगलादेशबाट १० हजार रेम्डिसिभिर, सिंगापुरबाट २० भेन्टिलेटर, पीसीआर कीट १ लाख २४ हजार, अमेरिकाबाट ५ लाख एन्टीजेन्ट, पीपीई आएको र थप आउने क्रममा रहेको छ ।

स्वीजरल्याण्डबाट ९७ करोड, अमेरिकाबाट ४३ करोड, सिंगापुरस्थित सामाजिक संस्थाबाट २३ करोड, स्पेनबाट १२ करोड , चीनबाट ७ करोड, बंगलादेशबाट ४ करोड र राष्ट्रिय तथा अन्तरराष्ट्रिय संस्थाहरूबाट जम्मा १३ करोड गरी २ अर्ब बराबरको स्वास्थ्य सामग्री उपकरण आएको उनले बताए ।