पाकिस्तानविरुद्ध अफगानिस्तान ५९ रनमै अलआउट

काठमाडौँ- पाकिस्तानविरुद्धको तीन खेलको एकदिवसीय सिरिजको पहिलो खेलमा अफगानिस्तान ५९ रनमै अलआउट भएको छ ।

श्रीलंकाको महिन्दा राजापाक्षे इन्टरनेसनल क्रिकेट स्टेडियममा मंगबार राति २ सय २ रनको लक्ष्य पछ्याएको अफगानिस्तान १९ ओभर २ बलमा सबै विकेट गुमाएर ५९ रनमात्रै जोड्यो ।

पाकिस्तानविरुद्ध एकदिवसीय खेलमा कुनै पनि टिमले बनाएको यो नै सबैभन्दा कम रन हो । यसअघि न्यूजिल्यान्ड सन् १९८६ मा ६४ रनमा आउट भएको थियो ।

खेल पाकिस्तानले १ सय ४२ रनले जित्दै सिरिजमा १-० को अग्रता समेत लिएको छ ।

मंगलबार राति अफगानिस्तानका लागि रहमतुल्लाह गुरबाजले १८ रन तथा अजमातुल्लाह ओमरजाईले १६ रन बनाउनुबाहेक अन्य खेलाडीले दोहोरो अंकमा रन जोड्न सकेनन् ।

अफगानिस्तानका चार खेलाडी शून्य रनमै आउट भए । पाकिस्तानका लागि हरिस राउफले सर्वाधिक ५ विकेट हात पारे ।

यसअघि टस जितेर पहिले ब्याटिङ गरेको पाकिस्तानले ४७ ओभर १ बलमा सबै विकेट गुमाएर २ सय १ रन बनायो । पाकिस्तानका लागि इमाम-उल-हकले सर्वाधिक ६१ रन बनाए ।

अफगानिस्तानका लागि मुजिब उर रहमानले सर्वाधिक ३ विकेट हात पारे ।