बागमतीका १४ सांसदले दिए स्पष्टीकरण

हेटौंडा : बागमती प्रदेशको १४ जना सांसदहरुले सोधिएको स्पष्टीकरणको जवाफ पेश गरेका छन् । शनिबार एमाले बागमती प्रदेशको संसदीय बोर्डले आज साँझ ५ बजेसम्मको समयसीमा तोकेर १४ जना माधव नेपाल पक्षका सांसदहलाई स्पष्टीकरण सोधेको थियो ।

अष्टलक्ष्मी शाक्य, राजेन्द्र पाण्डे, अरुण नेपाल, बसन्त मानन्धर, रचना खड्का, कृष्ण खनाल, शान्तिप्रसाद पौडेल, मनु सिग्देल, इन्द्रमाया गुरुङ, मिना ज्ञवाली, बसुन्धरा हुमागाईं, लक्ष्मण लम्साल, कुसुमकुमार कार्की र पार्वती सिलवालले स्पष्टीकरणको लिखित जवाफ पेश गरेका हुन् । उनीहरू बोर्डले कस्तो प्रतिक्रिया दिन्छ भनेर कुरेर बसेका छन् । लिखित जवाफ पेश गरेको तर अहिल्यै जवाफ सार्वजनिक नगर्ने सांसद मुनु सिग्देलले बताइन् । 

लामो समयदेखि संसदीय दल, पार्टी र दलका नेता तथा सरकारविरुद्ध गतिविधि गरेको र राष्ट्रिय सभा निर्वाचनमा पार्टीलाई हराउन भूमिका खेलेकाले कारबाही किन नगर्ने भनेर उनीहरुलाई स्पष्टीकरण सोधिएको थियो । उनीहरु सबैको लिखित जवाफ आएको र यसबारे थप अध्ययन गरेरअघि बढ्ने बोर्डका सदस्य दिपक निरौलाले जानकारी दिए ।