शकिब एसिया कप र विश्वकपका लागि बंगलादेशको कप्तान

काठमाडौँ- शकिब अल हसन बंगलादेशको एकदिवसीय कप्तानको रुपमा फेरि नियुक्त भएका छन् । उनले यसै वर्ष हुने एसिया कप र विश्वकपमा बंगलादेशको नेतृत्व गर्नेछन् ।

बंगलादेशका पूर्व-कप्तान तमिम इकबालले अगस्ट ३ मा ढाडको चोटका कारण एसिया कपबाट बाहिरिएपछि कप्तानी पद छाडेका थिए ।

बंगलादेश क्रिकेट बोर्डका अध्यक्ष नजमुल हसनले भने, 'हामीले एसिया कप र विश्वकपका लागि शकिबलाई कप्तान नियुक्त गरेका छौँ । विश्वकप र एसिया कपको टोली भोलि घोषणा गरिनेछ ।'

शकिबले पछिल्लो पटक सन् २०१७ मा एकदिवसीयमा बंगलादेशको नेतृत्व गरेका थिए । उनले अब बंगलादेशका लागि तीनवटै ‘फर्म्याट’ मा कप्तानी गर्नेछन् । शाकिबले सन् २००९ देखि २०११ को बीचमा ४९ एकदिवसीयमा बंगलादेशको नेतृत्व पनि गरेका थिए ।