सरकारबाट उच्चस्तरीय छानबिन समिति गठनको प्रतिबद्धता नआएकाे भन्दै एमालेद्वारा संसद् अवराेध

काठमाडौँ- सरकारबाट उच्चस्तरीय छानबिन समिति गठनको प्रतिबद्धता नआएको भन्दै नेकपा एमालेले मंगलबार पनि प्रतिनिधिसभा बैठक अवरुद्ध गरेको छ । 

मंगलबार बसेको बैठकमा सुन तस्करी प्रकरणमा गृहमन्त्रीले जवाफ दिने क्रममा उच्चस्तरीय छानबिन समिति गठनको प्रतिबद्धता नआएको भन्दै एमालेले सदन अवरुद्ध गरेको हो । मंगलबारको बैठकमा सबै दलका प्रतिनिधिहरूले धारणा राखेपछि उपप्रधान एवं गृहमन्त्री नारायणकाजी श्रेष्ठले सुन प्रकरणका बारेमा सदनलाई जानकारी गराएका थिए ।

गृहमन्त्रीले सरकारका तर्फबाट जवाफदेही ढंगले जवाफ नदिएको एमालेले आरोप लगाएको छ । एमाले सांसदहरूले सदनमा नाराबाजी गरे पनि सभामुख देवराज घिमिरेले कार्यसूचीमा रहेका सम्पूर्ण कार्यक्रम हटाएर बुधबारसम्मका लागि बैठक स्थगित गरे ।

त्यसअघि सदनमा सुन प्रकरणका बारेमा जानकारी गराउँदै उपप्रधान एवं गृहमन्त्री श्रेष्ठले राज्यले गर्ने अनुसन्धानलाई विश्वास गर्नुपर्ने धारणा राखे । उनले सुन सम्बन्धमा सीआइबीलाई नै छानबिनको अवसर दिइएको भन्दै ३५ दिनको समयमा सीआइबीले नसके नयाँ सिराबाट छलफल गर्ने र आवश्यक परे छानबिन समिति गठन गर्न सकिने धारणा राखे ।

उनले सुन प्रकरणका विषयमा आफूले दिएको अभिव्यक्तिले कसैमाथि चोट पुगेको भए माफी माग्ने बताए ।