गोदावरी नदीमा फसेका ६ जनाको सकुशल उद्धार

कैलाली- कैलालीको गोदावरी नदीमा फसेका ६ जनाको सकुशल उद्धार गरिएको छ । सोमबार राति अचानक आएको बाढीका कारण नदीको बीच भागमा फसेका ६ जनाको उद्धार गरिएको हो।

करिब साढे १० बजेको समयमा आएको बाढीका कारण फसेकाहरूको ११ बजे राति उद्धार गरिएको इलाका प्रहरी कार्यालय मालाखेतीले जनाएको छ । इलाका प्रहरी कार्यालय मालाखेतीबाट प्रहरी निरिक्षक रबिन्द्रसिंह कार्कीको कमाण्डमा ११ जनाको प्रहरी टोली, नेपाली सेना, सशस्त्र प्रहरी र स्थानीयको सहयोगमा नदीको बीच भागमा फसेकाहरूको उद्धार गरिएको हो । प्रहरीले नदीमा फसेकाहरूमा ५ जना पुरुष र १ जना महिलागरी ६ जनाको उद्धार गरेको हो। 

त्यस्तै सशस्त्र प्रहरी बलले कञ्चनपुरको स्याली नदीको टापुमा फसेका २ महिलाको उद्धार गरेको छ। सोमबार राति शुक्लाफाँटा नगरपालिका- ७ स्थित कालापानी निवासी ४० वर्षीया निर्मला भण्डारी र ३५ वर्षीया गौमती साउदलाई उद्धार गरिएको हो।

दुवै जनालाई सशस्त्र प्रहरी बल नेपाल नम्बर ३५ गण हेडक्वाटर शैलेश्वरीबाट सशस्त्र प्रहरी उपरीक्षक प्रेम रावलको कमाण्डमा खटिएको टोलीले उद्धार गरेको हो ।