प्रस्तावित राजदूतको सुनुवाइलाई अघि बढाउने

काठमाडौँ- संघीय संसद्अन्तर्गतको संसदीय सुनुवाइ समितिले प्रस्तावित राजदूतको सुनुवाइलाई अघि बढाउने भएको छ । राजदूतमाथिका उजुरीबारेको छलफलमा सांसदहरूले बेनामे र ठेगाना नखुली आएका उजुरीमाथि छलफल आवश्यक नरहेको धारणा राखेपछि आगामी बैठकले राजदूतको सुनुवाइ गर्ने समितिका ज्येष्ठ सदस्य ज्ञानेन्द्रबहादुर कार्कीले जानकारी दिए ।

त्यस्तै उनले राजदूत सिफारिस गर्दा समावेशी नभएको भन्ने विषयमा प्रश्न उठेकाले यस विषयमा आगामी बैठकमा परराष्ट्रमन्त्री एनपी साउदसँग छलफल गर्ने निर्णय भएको बताए । त्यसअघि बैठकमा समिति सदस्यहरूले पूर्ण विवरण नखोली आएका उजुरीहरूमाथि छलफल गर्न आवश्यक नरहेको धारणा राखेका छन् ।

समिति सदस्य जनार्दन शर्माले उजुरीहरूमाथि छलफल गर्न आवश्यक नरहेको तर समावेशीताका बिषयमा भने ध्यान दिनुपर्ने बताए । उनले लोकतान्त्रिक मूल्यमान्यताअनुसार चल्न सक्नुपर्ने बताए ।

त्यस्तै प्रमुख सचेतक पदम गिरीले पूर्ण विवरण उल्लेख भएका उजुरीहरूमाथि मात्रै छलफल गर्नुपर्ने र बेनामे उजुरीलाई ध्यान दिन आवश्यक नरहेको बताए ।

सरकारले गत असार २६ गते लोकबहादुर थापालाई न्यूयोर्कस्थित संयुक्त राष्ट्रका लागि स्थानीय नियोग, रामप्रसाद सुवेदी (स्वीट्जरल्याण्ड), सुधीर भट्टराई (फ्रान्स), घनश्याम लम्साल (कुवेत), तेजबहादुर क्षेत्री (संयुक्त अरब इमिरेट्स) र धनबहादुर वली (थाइल्याण्ड)का लागि राजदूतमा नाम सिफारिस गरी संसदीय सुनुवाइका लागि पठाएको थियो ।