सांसद गैरेको प्रश्न : आत्महत्यालाई प्रोत्साहन गर्ने मान्छे मन्त्री भइरहन मिल्छ कि मिल्दैन ?

काठमाडौँ– नेकपा एमालेका सांसद ठाकुर गैरेले स्वास्थ्यमन्त्री मोहनबहादुर बस्नेतले आत्महत्यालाई प्रोत्साहन गरेको आरोप लगाएका छन् ।

शुक्रबारको प्रतिनिधिसभा बैठकमा बोल्दै सांसद गैरेले कर्मचारीहरूले अपायक ठाउँमा सरुवा हुँदा समस्या भएको भनी गुनासो गर्दा मन्त्री बस्नेतले आत्महत्यालाई प्रोत्साहन गर्ने किसिमले जवाफ दिएकाे बताए । 

उनले बैठकमा आत्महत्यालाई प्रोत्साहन गर्ने मान्छे मन्त्री भइरहन मिल्छ कि मिल्दैन भनेर समेत प्रश्न गरे । ‘आत्महत्यालाई प्रोत्साहन गर्ने तरिका अत्यन्त दुःखद छ । म यसतर्फ सदनमा गम्भीर ध्यानाकर्षण गराउन चाहन्छु,’ उनले भने ।

सरुवाका पत्र बुझ्न नमान्ने र सरुवा भए आत्महत्या गर्छु भन्ने एक जना कर्मचारीलाई बस्नेतले आफ्नो कोठामा आएर झुन्डिन भनेका थिए ।

बस्नेतले उक्त भनाइलाई लिएर आलोचना भइरहेको छ ।