अर्थतन्त्र सकारात्मकतातर्फ अगाडि बढेको छ : अर्थमन्त्री महत

काठमाडाैँ– अर्थमन्त्री डा. प्रकाशशरण महतले अर्थतन्त्र सकारात्मकतातर्फ अगाडि बढेको बताएका छन् । शुक्रबार राष्ट्रिय सभा बैठकमा बोल्दै अर्थमन्त्री महतले अर्थतन्त्र चलायमान भइरहेको र सकारात्मकतातर्फ अगाडि बढेको बताएका हुन् ।

उनले मूल्यवृद्धि विगतभन्दा घटेको र सरकारले करको दायरा फराकिलो पारेको भन्दै राजस्व बढ्नेमा विश्वास व्यक्त गरे । उनले राजस्व वृद्धि हुने प्रशस्त आधार देखिएको समेत उल्लेख गरेका छन् ।  

अर्थमन्त्री महतले भने, ‘यसपाली करको दायरा फराकिलो पारेका छौँ । यसले गर्दा राजश्व बढ्छ भन्ने हामीलाई विश्वास छ । सबैतिरको यसमा सहयोग चाहिन्छ । अर्थतन्त्र बिस्तारै चलायमान हुँदैछ ।  पछिल्लो समयभन्दा अहिले मूल्यवृद्धि पनि घटेको छ ।  अर्थतन्त्र सकारात्मकतातर्फ बढेको छ ।'

' ब्याजदरमा पनि अलिकता सहजता हुने बित्तिकै थप चलायमान हुन्छ र राजस्व वृद्धि हुने प्रशस्त आधार दिन्छ । स्वास्थ्य क्षेत्रमा  स्वास्थ्य जोखिम शुल्क मात्रै नभएर अन्य शुल्क विनियोजन गर्नुपर्ने आवश्यकता छ,' उनले भने, 'त्यसतर्फ सरकार गम्भीरताका साथ लाग्छ । माननीयज्यूहरूले राखेको सुझावलाई हामी सहस्र आत्मसात् गर्छौ ।'

अर्थमन्त्री महतले आउने दिनमा स्वास्थ्य क्षेत्रमा अझ बढी कसरी विनियोजन गर्न सकिने कुरामा छलफल गरिने बताएका छन् । सदनमा बाेल्दै उनले गाउँ गाउँ दुर्गम क्षेत्रमा समेत न्यूनतम् स्वास्थ्य उपचार र रोकथामको सुनिश्चतता गर्ने, बेसिक हेल्थ केयरकाे सुनिश्चतता गर्ने  राज्यको लक्ष्य पूर्ति गर्ने तर्फ क्रियाशील हुने कुरा प्रकाश पारे । 

साथै, उनले आगामी दिनमा स्वास्थ्य क्षेत्रमा अझै बढी बजेट विनियोजन गर्ने आश्वासन दिएका छन् ।