विवादित अभिव्यक्तिबारे प्रधानमन्त्रीकाे स्पष्टीकरण : म त सुरुदेखि नै स्पष्ट पार्न पर्खिरहेको थिएँ

काठमाडौँ– प्रधानमन्त्री पुष्पकमल दाहाल 'प्रचण्ड'ले ‘आफूलाई प्रधानमन्त्री बनाउन सरदार प्रितम सिंह पटकपटक भारत गएको’ भनी दिएको विवादित अभिव्यक्तिमाथि आफूले सुरुदेखि नै स्पष्टीकरण दिन चाहेकाे बताएका छन् । 

सोमबार प्रतिनिधिसभामा उक्त अभिव्यक्तिमाथि स्पष्टीकरण दिने क्रममा उनले भने, ‘म त सुरुदेखि नै स्पष्ट पार्नका लागि पर्खिरहेको थिएँ । मलाई थाहा छैन किन संसद् अवरुद्ध गरियो ? राजीनामा नआएसम्म संसद् चल्न दिइँदैन किन भनियो ? मैले बुझेको छैन । के यही हो संसदीय अभ्यास ?’

उक्त विषय गम्भीर भएकाले आफूले सुरुदेखि नै त्यसबारे प्रष्ट पार्न चाहेको उनले जिकिर गरे । 

असार १८ गते प्रधानमन्त्री प्रचण्डले सरदार प्रितम सिंहको पुस्तक विमोचन कार्यक्रममा सिंह आफूलाई प्रधानमन्त्री बनाउन पटक–पटक दिल्ली गएको भनी अभिव्यक्ति दिएका थिए । त्यसलाई लिएर एमालेले बुधबारदेखि प्रतिनिधिसभा र राष्ट्रियसभा दुवै सदन अवरुद्ध पारेको थियो । 

एमालेले प्रधानमन्त्रीले राजीनामा नदिएसम्म संसद् चल्न नदिने बताउँदै निरन्तर अवरोध गर्दै थियो । 

सोमबार दिउँसो प्रधानमन्त्री प्रचण्डसहित प्रमुख तीन दलका नेताबीच बसेको बैठकबाट एमालेले संसद् चल्न दिने सहमति निस्किएको थियो ।