इंग्ल्यान्डका उप-कप्तान पोप एशेज सिरिजबाट बाहिर

काठमाडौँ- इंग्ल्यान्डको टेस्ट क्रिकेट टिमका उप-कप्तान ओली पोप एशेज टेस्ट सिरिजको बाँकी खेल गुमाउने भएका छन् ।

लर्ड्समा भएको दोस्रो टेस्टमा फिल्डिङ गर्ने क्रममा पोपलाई चोट लागेको थियो । दाहिने काँधमा चोट लागेका कारण उनी सिरिजबाट बाहिरिएको क्रिकइन्फोले जनाएको छ ।

इंग्ल्यान्ड क्रिकेट बोर्डका अनुसार शल्यक्रिया गर्नुपर्ने भएका कारण पोपले सिरिजको बाँकी ३ खेल गुमाउने छन् । काँधमा चोट लागेपनि दोस्रो टेस्टमा इंग्ल्यान्डको लागि पहिलो र दोस्रो इनिङ्स दुवैमा उनी ब्याटिङ गर्न आएका थिए ।

पोप सिरिजबाट बाहिरिए पनि इंग्ल्यान्डले कुनै पनि अतिरिक्त ब्याट्सम्यान टोलीमा नबोलाउने निर्णय गरेको छ।

जारि एशेज सिरिजको दोस्रो खेलमा पनि हार बेहोरेपछि इंग्ल्यान्ड ५ खेलको सिरिजमा २-० ले पछि परिसकेको छ । एशेज सिरिजको तेस्रो खेल भोलि (बिहीबार) बाट सुरु हुँदैछ ।