विज्ञापनसहित विदेशी च्यानल प्रसारण गर्ने केबल अप्रेटरलाई कारबाही गर्ने चेतावनी

काठमाडौं :  विज्ञापन बोर्डले नेपालमा प्रसारण हुने विदेशी च्यानल विज्ञापनसहित प्रसारण गरेर क्लीनफिडको अवज्ञा गरेको भन्दै केबल अप्रेटरहरूलाई कारबाही गर्ने चेतावनी दिएको छ । विज्ञापन (नियमन) गर्ने ऐन २०७६ को व्यवस्थाविपरित कतिपय अप्रेटरहरूले अवज्ञा गरेको बोर्डले जानकारी दिएको छ ।

एमएसओ, एलसिओ, आइपिटिभी, डिटिएच, आएसपीलगायत अन्य माध्यमबाट पनि विज्ञापनसहित विदेशी च्यानल प्रसारण भएको उजुरी आएपछि बोर्डले यस्तो चेतावनी दिएको हो । उसले भनेको छ, 'बोर्डले त्यस्ता प्रसारकहरूको अनुगमन गरिरहेको छ । कानुनी व्यवस्था विपरित प्रसारण नगर्न नगराउन सम्बन्धित सबैमा ध्यानाकर्षण गराइएको छ । अन्यथा कानुनबमोजिम कारबाही हुने व्यहोरा समेत जानकारी गराइन्छ ।'