दाउन्‍नेमा बस दुर्घटना : चार जनाको मृत्यु, ४० बढी घाइते

बुटवल : पूर्व-पश्चिम राजमार्ग अन्तर्गत पश्चिम नवलपरासीको दाउन्‍नेमा यात्रुबस दुर्घटना हुँदा चार जनाको मृत्यु भएको छ । आज बिहान बस दुर्घटना भएको हो ।

काठमाडौँबाट रुकुम पश्चिमका लागि छुटेको ना ५ ख २७१३ नम्बरको यात्रुबाहक बस दाउन्‍नेको खुर्सानी खोलाबाट सडकदेखि डेढ सय मिटर तल खसेको लुम्बिनी प्रदेश ट्राफिक प्रहरी प्रमुख डम्बर विकले इकागजलाई बताए ।

चारै जनाको घटनास्थलमै मृत्यु भएको हो । मृतकमध्य रुकुम पश्चिमको त्रिवेणी गाउँपालिकाकी २७ वर्षीया कल्पना पुनको मात्र सनाखत भएको छ । घाइतेको उद्धार गरी चिसापानी अस्पताल बर्दघाटमा ल्याइएको छ । बसमा रहेका ४० जनाभन्दा बढी यात्रु घाइते भएका प्रहरीले जनाएको छ । घाइतेमध्य केहीको अवस्था गम्भीर रहेको छ । गम्भीर घाइतेहरूलाई उपचारका लागि बुटवल लगिएको प्रहरीले जानकारी दिएको छ ।