सरकारले संसद्लाई गुमराहमा राखेर विधेयक पास गर्न खोज्याे : पदम गिरी

काठमाडौँ- नेकपा एमालेका प्रमुख सचेतक पदम गिरीले सरकारले संसद्लाई गुमराहमा राख्ने गरी विधेयक पास गर्न खोजेको आरोप लगाएका छन् ।

प्रतिनिधिसभाको आइतबारको बैठकमा केही नेपाल ऐनलाई संशोधन गर्ने विधेयकको छलफलमा भाग लिँदै गिरीले मिटरब्याज पीडितलाई न्याय दिनका लागि नभएर झुक्याउनका लागि संसद्लाई गुमराहमा राख्ने गरी विधेयक पास गर्न खोजिएको आरोप लगाएका हुन् । उनले सदनको अधिवेशनको सुरुमै पेस भएको अध्यादेश असार ११ गते राष्ट्रिय सभाबाट हतार हतार पारित गरिएको भन्दै अहिले प्रतिनिधिसभाको छलफलका क्रममा कुनै डकुमेन्ट पनि प्राप्त हुन नसकेको जिकिर गरे ।

उनले मिटरब्याजी प्रकरणमा राजनीतिक दलका ठूला नेता र प्रहरीका उच्च अधिकारीहरूको संलग्नता रहेकाले पीडितहरूलाई न्याय हुने गरी कानुन बन्नुपर्ने धारणा राखे ।