सुशासनको लडाईंमा सांसद र जनताले साथ दिनुहोस्, विकृतिको डंगुर भत्काएरै छाड्छु : प्रधानमन्त्री प्रचण्ड

काठमाडौँ– प्रधानमन्त्री पुष्पकमल दाहाल प्रचण्डले उच्च पदस्थहरू र देशको एउटा वर्ग कानुनभन्दा माथि छ भन्ने निराशावादी मान्यता गलत प्रमाणित भएको टिप्पणी गरेका छन् ।

बुधबार प्रतिनिधिसभामा मन्त्रालयगत विनियोजित बजेटमाथि उठेका प्रश्नको उत्तर दिने क्रममा दाहालले नक्कली भुटानी शरणार्थी प्रकरणको सफल अनुसन्धानबाट सरकारले कानुन र लोकतन्त्रको सर्वोच्चता प्रमाणित गरेको बताए । 

दाहालले भने, ‘उच्च पदस्थहरू र देशको एउटा वर्ग कानुनभन्दा माथि छ भन्ने निराशावादी मान्यता गलत प्रमाणित भएको छ । यो काण्डको सफल अनुसन्धानसँगै अब लोकतन्त्रको सर्भिसिङ र शुद्धिकरण सुरु भएको छ ।’

त्यस्तै, उनले ललिता निवास काण्डका अभियुक्त, मिटरब्याजी र सहकारीका ठगहरूमाथि पनि कारबाही सुरु भएको बताए । 

वर्षौँदेखिको विकृतिको डंगुर सफा गर्ने सुशासनको लडाईंमा आफूलाई सांसद र जनताको अझ धेरै साथ आवश्यक रहेको बताउँदै उनले भने, ‘वेथितिको दुष्चक्र नभत्काएसम्म न देश अघि बढ्नेछ न लोकतन्त्र । म संकल्प गर्छु, कुनै पनि मूल्यमा विकृतिको यो डंगुर भत्काएरै छाडिनेछ ।’